uMthunywa
KULE iviki kwezokuthokozisa iphephandaba likazulu liphethe ezigijimisa igazi kuphela. Angithi nje lize lengqungquthela zeqembu likamaskandi elidabuka eTsholotsho njalo okuyilo elaqala ukusungulwa kuleli. Kambe kungabe kuyiliphi leliqembu ngaphandle kwaBafana BakaMzilikazi.
Othanda ukuzithokozisa kule iviki kaxhumane lengxoxo enambithekayo ephakathi kwentatheli yephephandaba likazulu uCornelius Luphahla (CL) kanye lomholi waleliqembu uDoit Nkomo (DN). Kayitshayi nje isiginci lindoda yenza kodwa.
CL: Umphakathi uthanda ukwazi ukuthi ngubani uDoit Nkomo njalo waqala nini ezokucula?
DN: Mina ngakhulela esigabeni seSusumane eTsholotsho ngafunda eMavela Government School ngaze ngayaqeda uFomu 4. Ezokucula ngaqala ngisafunda lapho engangiculela iqembu esasilalo esikolo. Ngaqhubeka-ke ngokucula ngaze ngasuka kwelakithi ngo-2006 ngazosebenza eSouth Africa lapho engafika khona ngagidela amanye amaqembu omculo kamaskandi atshiyeneyo.
Kwathi ngo-2010 ngasungula elami iqembu ngilamalunga amane mina ngingowesihlanu, agoqela uBrilliant Dube, Kabelo Nyathi, Mzingeli Tshuma kanye loNewman Tshuma.
CL: Kungani wakhetha ukucula umculo kamaskandi njengoba wawuvele ungekho kwelakithi?
DN: Okwenza ngacula umculo kamaskandi yikuthi ngangifisa ukuthi isiNtu sakithi singasilahlekeli njengoba umculo kamaskandi uqukethe kakhulu ezamasiko. Okunye njalo yikuthi ngangizibonela ukuthi isiphiwo sami sikumaskandi, ngabe ngacula omunye umculo ngangingasoze ngiwulolonge njengomaskandi.
CL: Kungani wakhetha ukuculela kweleSouth Africa jahelibanzi?
DN: Okwenza ngazoculela kweleSouth Africa yikuthi kwelakithi akulandawo zokuthengisela umculo njalo umculo kamaskandi awukadumi kakhulu okuchaza ukuthi abantu abawusekelayo basasebalutshwana. Ngalokhu-ke kuba nzima ukuthi ukhule nxa ucula umculo lo yikho ngifika ngokuvakatsha ngisakaza umculo wami.
CL: Lokhe waqala ukucula sowakhipha amadlalade amangaki mfokaNkomo?
DN: Lokhe ngaqala ukucula sengakhipha amadlalade amahlanu. Elakuqala salikhipha ngo2011 lithi Bathini Labafana, kuze elika2012 elithi Hlehlani Bafana, kulandele elika2013 elithi Ungubaba Onjani, elika2014 lithi Intandane kuthi elika2016 lithi Usizi.
CL: Abantu bathini ngomculo wakho njalo ukhangelele ukubenzelani lonyaka njengomholi weqembu?
DN: Abantu bayawuthakazelela kakhulu umculo wami njalo lonyaka ngikhangelele ukubajabulisa ngamandla ngokubakhiphela I-DVD engizayikhipha mhlaka 29 Mfumfu. Okunye njalo ngikhangelele ukuvakatshela endaweni ezinengi ezehlukeneyo ngisenza ama shows ngijabulisa uzulu.
CL: Njengeqembu laBafana BakaMzilikazi landise ukudlalela ngaphi ingoma zenu?
DN: Ingoma zethu njengeqembu likamaskandi sandise ukuzitshayela emikhosini etshiyeneyo egoqela emitshadweni, emidlalweni efana lamadili okuzalwa, kanye lakuma-shows esiwenza endaweni ezehlukeneyo. Okunye njalo ungasimema emkhosini wakho othile siyabuya sizokujabulisa.
CL: Ngaphandle kokucula msebenzi bani owenzayo kweleSouth Africa?
DN: Mina ngiphila ngokucula kuphela, akula omunye umsebenzi engiwenzayo lapha ngikhangelele emculweni kuphela.
CL: Bunzima bani oyake uhlangane labo njengomculi mfokaNkomo?
DN: Ubunzima engiyake ngihlangane labo njengomculi yikuthi abantu bayantshontsha umculo wami bawuthengise ngentengo ephansi okuyikho okwenza singathuthuki masinyane kwezomculo. Okunye njalo yikuswela imali yokuzithuthukisa, njengoba ngingasebenzi kusuka kube nzima ukuthi sithuthukise umculo wethu ngoba ezinye izinto zidinga imali.
CL: Nkuthazo bani oyipha abaculi abasasungula?
DN: Kubaculi abasacathula ngithi kababambelele ngamandla emculweni bengadeli noma kunzima ngoba vele emculweni kunzima. Okunye njalo ngithi kabasebenzise iziphiwo zabo bengaculeli ukuthola udumo ngoba abasoze bathuthuke.
