uMthunywa
Cornelius Luphahla
UMCULI wodumo kweze-rumba uAllen Ndoda Ndlovu usile ngokulambisa kweleSouth Africa kulandela ukubanjwa inkunzi yizigebengu zamthathela imali kanye lezinye impahla zokucula abezithwele.
UNdoda wehlelwe ngamashwa la ngeSonto kuyonale iviki ngehola lika-8 ntambama eMalibongwe Road evela emkhankasweni wakhe we-Operation Greet the Fans abewuqhuba kweleSouth Africa.
Kubikwa uNdoda uthwalelwe esibhedlela kodwa ufike welatshwa wakhululwa ukuthi ayesila engekhaya.
UMthunywa uxhumane loPromise Sibanda owaziwa ngokuthi nguDJ Mappressor onguye obehamba loAllen ngesikhathi engakabanjwa inkunzi wathi ubanjwe ngesikhathi sebehlukene bevela emkhankasweni wokukhulumisa uzulu.
“Ukubanjwa kukaAllen inkunzi kungizwisa ubuhlungu kakhulu ngoba ubanjwe ngesikhathi ngisanda ukwehlukana laye ntambama sivela emkhankasweni wokukhulumisa abalandeli bakhe emalokitshini wonke eGauteng Province kusukela ngoMgqibelo. Kuthe ngeSonto ntambama sehlukana lami ngaya engihlala khona yena wathi esemgwaqweni weMalibongwe bambamba inkunzi.
“Kubeyinhlanhla ngoba abambulalanga bamtshaye bamlimaza kuphela basebemthathela imali engangeR8 000, amabhokisi ama t-shirts kanye lamakepesi, ama-CD edlalade lakhe elitsha elithi Ngizoqala eTsholotsho kanye le-laptop,” kutsho uDJ Mappressor.
Ekhuluma loMthunywa uNdoda uthe uzwa ubuhlungu ngokubanjwa kwakhe inkunzi kodwa noma kunjalo uzaqhubeka ejabulisa abalandeli bakhe ngezomculo.
“Ngizwa ubuhlungu ngesiga esingehleleyo kodwa uNkulunkulu nguye okwaziyo. Okunye okungizwisa ubuhlungu yikuthi amasela la angithathele omakhalekhukhwini bami okuyibo abalandeli bami akade bengixhuma khona.
“Noma kunjalo ngizaqhubekela phambili ngijabulisa uzulu ngakho mhlaka-29 Mfumfu ngizakhipha idlalade lami elitsha elithi, Ngizaqala eTsholotsho.”
“Ngemva kwalokho ngizavakatshela kwelakithi ngoMpalakazi ngiqhubeke ngomkhankaso wami wokukhulumisa abalandeli endaweni ezibalisa ePlumtree, Tsholotsho, Victoria Falls kanye lakoBulawayo,” kutsho uNdoda.
“KoBulawayo ngizaqhuba umkhankaso wami lo ngibhoda amalokitshi wonke ngihamba ngitshayela abalandeli bami ingoma zami ngithengisa lamadlalade ami,” kuphetha uNdoda.
