uMthunywa
Iminyaka 17 kangilamntwana
LINJANI Khulu? Sengidubekile ngohlupho lokuswela inzalo. Sengileminyaka engu-17 ngalotsholwa kodwa ukuzithwala kuyehlula.
Umkami kukhanya kukhona asekucabanga, lami sokungikhathaza ngoba umuzi wami ungachitheka loba nini. Ngenzeni?
Impendulo
Mzukulu kawuzange ungitshele ukuthi kuze kudlule iminyaka yonke le wake wadinga na usizo? Bengifisa njalo ukuthi ungitshele ukuthi wena lomkakho lake laya kubodokotela loba kubosiyazi labaphurofethi njalo bathini.
Mzukulu kulezinto ezimbalwa ezibangela ukuswela inzalo. Ngiyazi bakhona abanye abazasizakala ngokubala ngohlupho lolu. Ukungazithwali kungabangelwa yikuba lesilumo esiyindoda, kumbe nxa wake waba lomkhuhlane othelelwana emacansini (STI) kumbe njalo nxa wake wakhipha isisu ngendlela engayisiyo.
Kuhle mzukulu uye kudokotela esibhedlela bayebona ukuba kubangelwa yini. Kungenzeka njalo ukuthi kulomthambo ongahambi kuhle obangela lokhu. Bazakuncedisa.
Angabe engithanda kumbe
Ufuna imali yami nje?
Khulu: Ngingumama oleminyaka engu-34, ubaba engithandana laye uleminyaka engu-37. Uhlupho lwami yikuthi ubaba lo kakaze angenzele lutho ngitsho lokungithengela ukudla, impahla yangaphansi loba nje isepa yokugeza kodwa yena njalonje uhlala engicela ukuthi ngimenzele izinto ezitshiyeneyo. Undoda lo kasihlali sonke.
Angabe engithanda kumbe ufuna imali yami nje kuphela?
Impendulo
Mzukulu, kawusatshongo ngokuthola kwakhe, usitshiye silenga emoyeni. Mzukulu iminwe ayilingani. Ngesinye isikhathi iminwe yakhe imfitshane, njalo isifiso ulaso kodwa kube sekusweleka isiliva kuye. Kuyadingakala ukuba izinto ezinje like lizixoxe kabanzi libabili, njalo lawe umlandisele ngesifiso langombono wakho ukuthi njengomuntu wesifazana ukhangeleleni kuye.
Okunye mzukulu abanye abantu empilweni bajayele ukucelwa nxa engasacelwanga akuphumi lutho kuye. Kawusatshongo ukuba wake wacela, yena waphendula wathini. Insika yikukhulumisana libabili hatshi ukuhle umphawule ukuba ufuna imali yakho.
