uMthunywa
Emvelweni yethu thina abansundu sasilakho lalamuhla silokhu silakho okunathwayo ngesikhathi lesi sokutshisa. Lezi insuku alitshisi likhupha inhlanzi emanzini.
Ngokuhlangana kwezizwe abantu abansundu sebeziqandisa ngokunatha imihlobohlobo yamanamunede kanti-ke okhokho labo babekwazisa ukunatha amahewu ngezikhathi zokutshisa kumbe nxa kulamalima ezigabeni ezehlukeneyo.
Lamuhla ngilethulela ukwenziwa kumbe ngithi ukuvutshwa kwamahewu. Amahewu engizakhuluma ngawo ayimikhakha eyehlukeneyo ngizawaphatha kanjalo.
Amahewu avutshwe ngesitshwala
Okudingakalayo
1. Isitshwala esingaba sisele nxa kudliwa kumbe oyabe usiphekele khona ukuvuba amahewu.
2. Imvubelo eyenziwe ngemithombo yophoko olumilisiweyo lonyiswa lwacholwa lwabayimpuphu.
3. Imvubelo yefulawa.
4. Isikali kumbe udiwo lokuvubela amahewu aze abile.
5. Inkomitsho zokunathisa amahewu.
Amahewu elambazi
Okudingakalayo
1. Impuphu yokupheka ilambazi.
2. Imvubelo yemithombo.
3. Isikali kumbe udiwo lokuvubela amahewu.
4. Imbiza yokuphekela ilambazi.
5. Uphini kumbe uphehlo lamanzi.
6. Inkomitsho zokunathisa amahewu.
Ukuvuba amahewu esitshwala
-Khupha indandatho eminweni ubusugeza izandla zakho zihlambuluke, nxa ulenzipho uziqume.
-Thatha isitshwala esiseleyo nxa kudliwa kumbe osiphekele ukuvuba amahewu akho, sibone ukuthi siyaqanda.
-Thela amanzi esikalini ubufaka iziqa zesitshwala phakathi kwamanzi.
-Cuba isitshwala ngezandla size sisale sesinjengelambazi.
-Khathesi thatha imvubelo yemithombo loba eyefulawa uvubele ngayo.
-Thela lolubudubudu ediweni ubusuvala ngelembu.
-Beka endaweni ekhudumalayo ulinde ukubila kwawo amahewu akho. Lokhu kungathatha usuku olulodwa kumbe ezimbili kusiya ngomkhathi, kumbe ubulula besandla sakho.
-Lapha esebila uzawabona ngokuxhwatha esenza igwebu phezulu.
-Wena-ke zilungisele ukuwanatha khathesi njalo usungawabeka endaweni eqandayo.
-Wathelele abemuli enkomitshweni, abanye bathanda ukuwafaka itshukela kanti abanye bawathanda enjalo.
Ukuvuba amahewu elambazi
-Pheka ilambazi lempuphu yomumbu kumbe amabele.
-Liyekele livuthwe sibili ubusulithululela enditshini.
-Ligoqoze ngophini lize lipholaphole kancinyane, bona ukuthi alipholi qha.
-Lingakapholi vubela ngempuphu yemithombo yophoko.
-Kuzakuthi lapha uvubela lona ilambazi lizahlambuluka libe lula.
-Liyekele liphole sibili.
-Ngokuphola kwalo phinda njalo uvubele imvubelo.
-Thela ilambazi leli ediweni kumbe esikalini uvale ngelembu elihlanzekileyo.
-Beka emkulwini ulinde ukubila kwawo ngemva kosuku olulodwa kumbe ezimbili kusiya ngomkhathi.
-Nxa esebila amahewu ayaxhwatha igwebu lize phezulu.
-Lapho-ke usungawathelela abemuli banathe bakholise baqede umhawu wokutshisa kwelanga.
-Wabeke endaweni eqandayo ukuze engaqhubeki ebila aze abe munyu kakhulu.
