Amalungelo lemilandu yethu sonke: Umuntu ngumuntu ngabantu

21 Oct, 2016 - 00:10 0 Views

uMthunywa

silo, Pumulani Mpofu

Njengabantu abansudu sikhuliswa sifundiswa ukuthi umuntu ngumuntu ngabantu.Kubabuhlungu nxa owesifazane engayakwenda befike bengamthakazeleli emendweni ecine esesiba liqembu elizimele lodwa. Kukalutshwana ukuthi omalukazana labo mamazala bazwane. Kuhlala kukhona omunye oyabe ethwalise omunye amagabha avuzayo.

Lokhu kubangelwa yikuthi umalukazana wandise ukuphathwa njengesethekeli kulelunga lomndeni. Lokhu ngikutsho ngoba umalukazana kulezinto angazitshelwayo kumbe angamelanga abezazi ngemuli ayabe endele kuyo. Ngenxa yalokhu uhle laye azizwe engemukelekanga emulini leyo njalo izikhathi ezinengi ufuneka nxa kulemisebenzi enjengokulima, imfa lemitshado, lapho abakwabozala abayabe bemcubungula yonke into ayenzayo ukwenzela ukuthi babone ukuthi ukhuthele kumbe livila elilezandla ezadliwa zinkwawu. Into abesifazane abasuka bayilibale yikuthi loba engubabakazi ngakibo, lapho ayendele khona uyabe engumalukazana, abe ngumama emzini wakhe logogo kwabanye abantu.

Ingakho nxa ephatha luklubhu umalukazana, ukuthi yena nxa sebemphatha kubi uzezwa njani, mahlabezulu.

Okwenza uSitshela, loNgwenya kuyamenza. Ngithole ithuba lokuxoxisana lomalukazana wakoDonga, uSizalobuhle owayetshade umtshado wesintu loEmmanuel Donga. Umkakhe wabuya wazolobola lomnewabo labangane bakhe ngoba imuli yangakibo yayisala isithi ayimfuni lowo malukazana ngenxa yezizatho zabo ezitshiyetshiyeneyo.

Abazange balobe phansi ukuthi kube lobufakazi ukuthi balobola kubani, ngelanga elingaka lomnyaka wakhona.

Abasazange bakunakana lokhu ngoba uEmmanuel owayesekufuna yikuthi ayekwakha umuzi azihlalele lonkosikazi wakhe. Bahlala bonke okweminyaka engamatshumi baba labantwana abathathu, andubana uEmmanuel abhubhe.

Uhlupho uSizalobuhle aba lalo yikuthi abangakibo  komkakhe, abakoDonga abagoqela uninazala labobabakazi kabazange bamthakazelele, loba laye wayezama ukuthi abafinyelele babemphatha njengomthakathi owayelande ukuqeda imali yomfowabo lomtanabo. Ababekukholwa yikuthi umuntu lo ababemzonda kangaka nguye owayebachinsise ukubizwa ngokuthi babakazi loba gogo. USizalobuhle esehluleke ukubhoboza inhliziyo zezihlobo zangakibo kamkakhe, wacina esedela laye, wacina eseliqembu elizimele lodwa ngoba esebona ukuthi wayengamukelekanga koDonga.

Njengoba wayeliqembu elizimele lodwa, kenelisanga ukuthi athathe incwadi yokufa komkakhe ngoba babengatshadanga njalo isithupha sakhe sasingela sibongo somkakhe.Waze wenelisa ukuthatha incwadi yokufa komkakhe ngemva kweminyaka emihlanu esencediswa ngabomthetho. Uhlupho aselalo khathesi yikuthi loba incwadi yokufa komkakhe elayo kenelisi ukuthi athathe ama-pension omkakhe eSouth Africa ngoba engelayo incwadi yomtshado. Incwadi yokufa komkakhe ayilabufakazi obunganani ukuthi wayetshadile ngoba ilotshwe ukuthi wayetshade umtshado wesintu ongabhaliswanga.

AbeHigh Court yelizwe leSouth Africa bafuna ubufakazi obuvela ezihlobeni zomkakhe. Izihlobo zakibo kaDonga zithi zavuma ukuthi athathwe ngomunye wabo ukuthi ayemfakazela kweleSouth Africa ukwenzela ukuthi enelise ukuthola imali ezatshiywa ngumkakhe. Njengoba yena engafuni ukungenwa, useswele ukuthi athini uMaMdlongwa ngoba lomnewabo womkakhe kasafuni ukumncedisa ngoba uyesaba ukuthi izihlobo zakibo zizamloya afe laye atshiye abantwabakhe besesebancinyane.

Umalukazana wakoDonga njengenhlanganiso simxwayise ukuthi aye emthethwandaba loba adinge umeli, ozamcedisa ukuthi bathumele amasamanisi ezihlobeni zomkakhe ukwenzela ukuthi enelise ukufumana imali ayitshiyelwa ngumkakhe ezamncedisa ukondla abantwana labo benelise ukuya esikolo bethole lamanye amalungelo abo ehlukeneyo ukwenzela ukuthi babe lekusasa elihle.

Ngithanda ukulikhuthaza ukuthi omalukazana bebambane lezihlobo zabomkabo loba bengaze babaphathe luklubhu, bebe labanye abazwana labo kulokuthi bahle babengamaqembu azimele wodwa, ngoba bengazi ukuthi bazazifuna nini izihlobo zabomkabo. Asihlanganeni ngeviki ezayo

Umlobi utholakala kunombolo zocingo ezithi 0773 195 055  [email protected].

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds