uMthunywa
Johas Moyo
INHLANGANISO ye-Agritex esabelweni seMatabeleland North ikhuthaza abalimi ukuthi baqalise ukwenza i-dry planting ngoba kukhangelelwe ukuthi izulu lizaphangisa ukuna lonyaka.
UMnumzana Dumisani Mbikwa Nyoni onguProvincial Agricultural Extension Officer esabelweni seMatabeleland North ukhuthaza abalimi ukuthi baqalise ukulima lanxa komile (dry planting) ngoba kukhangelelwe ukuthi izulu lizaqalisa ukuna ekupheleni kwayonale inyanga.
“Sikhuthaza abalimi ukuthi baqalise i-dry planting ngoba izulu seliseduze ukuthi line. Kumele kuthi izulu liqalisa nje inhlanyelo yabo ibe isiphansi ukwenzela ukuthi bengatshiywa ngumdaka,” kutsho uMnu Nyoni.
Uthe kuvamile ukuthi izulu eMatabeleland liqalise ukuna kusukela mhlaka 13 kuLwezi.
“Kungaba kuhle ukuthi abalimi babone ukuthi inhlanyelo yabo isiphansi sekusele amaviki amabili ukuthi izulu line ngoba senzela ukuthi ubudli kanye lezibungu eziphansi zingatshabalalisi inhlanyelo yabo,” kutsho uMnu Nyoni.
Uqhubekele phambili ekhuthaza abalimi ukuthi nxa befaka inhlanyelo bafake lomvundiso emagodini ukuze izilimo zabo zikhule masinya njalo babe lesivuno esihle.
“Abalimi besidakeni kanye lesibomvu kumele babone ukuthi batshonisa inhlanyelo yabo ibe ku5cm phansi ukwenzela ukuthi nxa izulu lingana kancane lingakhuntisi inhlanyelo ngoba lokho kungenza ukuthi bacine belahlekelwa yinhlanyelo enengi phansi.
“Sikhuthaza abalimi ukuthi bananzelele okufunwa ngumhlabathi abahlanyela kuwo njalo lokuthi izulu landise ukuna ngasiphi isikhathi. Lokho kuzabasiza ukuthi inhlanyelo yabo ingadliwa yibudli kanye lokuthi nxa lingananga kakhulu inhlanyelo ingaboliswa lizulu.
“Kukanti kwezinye indawo senzela ukuthi bangatshiywa ngumdaka njengoba izulu lingana kakhulu balakho ukungenelisi ukuthi balime ngoba kulodaka ikanti isikhathi sokwenza lokhu sikhona,” kutsho uMnu Nyoni.
Uphethe ngokukhuthaza abalimi ukuthi bananzelele ukuthi isivuno esihle sitholakala ngokwenelisa ukuhlela indlela ohlanyela ngayo.
“Nxa sikhuluma nge-plant population sitsho ukuthi umlimi kumele enelise ukuhlela kuhle ukuze abone ukuba kaminyanisi njalo kakubi lezikhexe ezinkulu kakhulu futhi,” kutsho uMnu Nyoni.
