uMthunywa
ABADLALI abahlanu abeqembu leMamelodi Sundowns sebekhethwe kuluhlu lwabadlali abazancintisana ukuphiwa isicoco salowo odlale ukwedlula bonke eAfrica lonyaka, kubika inhlanganiso yeConfederation of African Football.
Phakathi kwabadlali laba kuloKhama Billiat weZimbabwe. UBilliat uzivusele udumo lonyaka ngokunqoba njalo kusicoco sokuba ngumdlali otshibilika kulabo bonke kuligi yeAbsa Premiership eSouth Africa. Abanye bakhe kuMamelodi Sundowns abangene kuluhlu lwezingcitshi zenguqu eAfrica nguKeagan Dolly, uDenis Onyanga, uHlompho Kekana loYannick Zakri owangena kuSundowns evela eAsec Mimosas.
Abadlali laba bakhangelele ukuphiwa isicoco somdlali oseAfrica. Unozinti weKaizer Chiefs uItumeleng Khune ngomunye walabo abake bangena kukhetho lolu.
Iqembu leMamelodi Sundowns liyazigqaja njalo ngoba uDolly, uBilliat loOnyango bangenile lasehlelweni lokukhethwa komdlali ophezulu kulabo bonke abazalwa eAfrica loba bedlala kwamanye amaligi angaphandle kwezwekazi le-Africa.
Kusicoco esikhulu lesi, bobathathu laba kuzamele babophe iminwe njengoba bencintisana lezikhokho zikanobhutshuzwayo uRiyaad Mahrez oweLeicester City, uPierre-Emerick Aubameyang oweBorussia Dortmund, uJohn Obi Mikel waseChelsea, uSamuel Etoo loAndrew Ayew loMohammed Salah otshibilikela iAS Roma.
Abanqobi bazamenyezelwa mhlaka 5 Zibandlela ngomnyaka ozayo0, ngokutsho kweCaf. — Ubulembu
