uMthunywa
YiNtatheli kaMthunywa
ABABUKELI bomdlalo wokuqaga koBulawayo basele begegedeka ngokuqala ukubona amadoda encintisana kulumdlalo owaziwa ngokuthi udlalwa ngabesifazane.
Lokhu kubonakale ngempelaviki edluleyo enkundleni yesikolo seSt Columbu’s.
Kudibane amaqembu ayisikhombisa kujongwe ukuthi kutshengiswe umphakathi ukuthi lamadoda ayenelisa ukudlala umdlalo wokuqaga.
Omunye wabaqoqi bomncintiswano uMaxwell Nyandoro ubike ukuthi bafuna kubonakale ukuthi umdlalo wokuqaga awusimdlalo wabesifazane bodwa.
“Injongo yethu ngeyokuthi sazise abantu ikakhulu abathandi bomdlalo ukuthi i-netball ingadlalwa langamadoda.
Akhona amadoda ayithanda kakhulu i-netball.”
UMthunywa uzwe ukuba koBulawayo kulamaqembu amabili asephatheka kulumdlalo loba nje sekulomkhankaso wokubiza amanye amadoda ukuthi azofundela umdlalo lo.
Amathimu womabili la yiBlack Panther leHighlanders. Kumkhosi lo obuseSt Columbu’s bekudibene njalo amaqembu avela eKwekwe, eMutare, eZimplats, iRangers leSparrows eyeHarare.
Umqeqetshi weBlack Panthers uJoshua Mungozhi uthwele nzima ukuthi achasisele abathandi bemidlalo ngenhloso yabo yokudlalisa amadoda lumdlalo.
“Kwakunzima ukuthi abesifazane bavunyelwe ukuthi badlale inguqu, kunjalo lakumdlalo wokuqaga. Abanye kuyabamangalisa ukuthi amadoda asedlala i-netball.
Kusenjalo, ngemva kweminyaka yokudlalela indlala, abadlali bebhola lokuqaga kuleli sebezathola usizo losekelo lwemali.
Kubikwa ukuba kulamankampani aseveze ukuthi afuna ukuba yingxenye yomdlalo wokuqaga. Abafakazi abaqotho bancwebe uMthunywa indlebe ukuba inhlanganiso ephethe umdlalo lo eyeZimbabwe Netball Association kungenzeka ihlale phansi lamanye amankampani kubotshwe isivumelwano.
“Kukhanya kulamankampani athembisayo. Iligi enkulu yiyo engathola usizo,” kubika omunye umfakazi osebenza kuZimbabwe Netball Association.
