Isinukelela inkezo yeChibuku

21 Oct, 2016 - 00:10 0 Views
Isinukelela inkezo yeChibuku UErol ‘‘Mkabayi’’ Akbay

uMthunywa

IHIGHLANDERS leNgezi Platinum, amaqembu omdlalo kanobhutshuzwayo kuligi ephezulu adibana okwesithathu kulimpelaviki, kudingwa elizaqethula elinye kuhlandla lama semi-final enkundleni yeBarbourfields.

Akubizwa ozwayo eMagumeni ikakhulu kubalandeli beHighlanders asebebone iqembu labo lidonsa imidlalo eyisitshiyagalolunye lihuba ngokunqoba kuphela. Kube zindaba ezinhle njalo kubalandeli laba ukuba lumdlalo ubeseBarbourfields.

IBosso ihlangana lezimbamgodi zeNgezi ezilokhu zilesilonda esibhibhidlayo sokunqotshwa kabili kumidlalo yeligi yeCastle. Mhla ziqala ukuhlangana ngoNkwenkwezi, iBosso yahlohla ezine eqandeni kuNgezi Platinum. Ziphinde zadibana eBarbourfields ngoMpandula, iHighlanders yazinqobela lula ngo-2-1.

Pho kuyozala nkomoni ngeSonto, zisithi 23 kuMfumfu?

Umqeqetshi weNgezi Platinum uTonderai Ndiyara ubikele uMthunywa ukuthi uyiwomele iHighlanders njalo kasoze avume ukuthi imyangise kathathu.

“Kwakumele ngiyinqobe iHighlanders kuhlandla lesibili. Ngakho njengoba sesihlangana kunkezo yeChibuku, ngizabopha ziqine. Sengibonile ukuthi iqine ngaphi iHighlanders, okutsho ukuthi sengilalo icebo lokuphuma nginqobile eBarbourfields. Ngiyayihlonipha lithimu kodwa angeke ngivume ukunqotshwa yithimu eyodwa kathathu,” kutsho uNdiraya ngoLwesibili.

Umqeqetshi weHighlanders uErol Akbay uthe akulanto angayitsho ngomdlalo lo ngaphandle kokuthi uzabumba iqembu njengalokho ajwayele ukukwenza.

“Ngilungiselele ngaphelela ukuthi sidlalele ukufinyelela ama-finals alinkezo. Angila okunengi engingakuphawula ngomdlalo wethu leNgezi Platinum. Inhloso yami yikuqhubeka ngokunqoba,” nguAkbay lo esenkundleni yokulolonga abadlali bakhe koBulawayo kuliviki.

Kusenjalo ngoMgqibelo ziyaduma laseMandava edolobheni leZvishavane lapho iFC Platinum enxuse khona iHarare City, intshantshu zenkezo yeChibuku ka2015.

Amaqembu la awaqali ukuhlangana. Kuligi yeCastle Lager iHarare City ayikaze idliwe yiFC Platinum. Lonyaka iHarare City itshaye izimbamgodi yaziphendulela 2-0 kuhlandla lakuqala, kwaphetha kungutshiki lobhanqa kweyesibili.

Imbali yokudlala kwamaqembu la iveze ukuthi iHarare City izavula indlela ifike ku-final yenkezo yeChibuku Super Cup.

Imidlalo yonke iphuma kumabonakude we-Supersport.

Nansi imidlalo yeChibuku Super Cup:

NgoMgqibelo: FC Platinum v Harare City (Mandava).

NgeSonto: Highlanders FC v Ngezi Platinum (Barbourfields).

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds