uMthunywa
Iphephandaba likazulu njengoba nje lisaziwa ukuthi lidume ngezimnandi ezijabulisa umphakathi, kule iviki liphethe ingadlangadla yeqembu lezomculo werhumba elidabuka eBinga. Leliqembu liholwa nguTinashe Mpofu ijaha elidabuka eLubimbi.
Ingena kuvunguze umoya indoda yakoMpofu, kayitshayi nje isiginci yenza kodwa. Othanda ukuzwa ngaleliqembu nansi ingxoxo ejulileyo phakathi kukaTinashe Mpofu (TM) okhokhela leliqembu loCornelius Luphahla (CL) intatheli yephephandaba likazulu.
CL: MfokaMpofu uzulu uthanda ukwazi mayelana lembali yakho kwezomculo.
TM: Mina ngazalelwa esigabeni seLubimbi okuyikho engakhulela khona ngabuya ngafunda khona. Kuthe ngenxa yokuthi ngabhujelwa ngubaba kwaba nzima ukuthi ngiqhubeke ngezifundo zami ngasengicina kuGiredi 7. Ukucula ngavela ngakhula ngicula noma nje ngangingakaziwa.
Ngo2010 ngasuka kweleZimbabwe ngayadinga umsebenzi eSouth Africa okuyikho engikhona lakhathesi. Lapha-ke ngafika ngangena kuqembu likaMduduzi Golide okuyikho engisuke khona kumnyaka ophelileyo ngasungula iZtyeni Super Sounds.
CL: Njengoba abaculi abanengi baqala ezokucula ngemva kokuthathekiswa ngabanye abaculi abathile wena uze ukhethe ukucula umculo werhumba wawuthathekiswe ngubani?
TM: Mina ngize ngiqale ukucula ngangisizwa ngitshiseka ukuthi ngicule engingathi ngafuqwa yisiphiwo engasiphiwa nguNkulunkulu. Okokuthatheka lakho ngokunye okwenza ngaqala ukucula ngoba ngangithanda umculo weNdolwane kanye lokaAllen Ndoda.
Lokhu kwenza ngabona kungcono ukuthi lami ngisungule elami iqembu lezomculo.
CL: Emculweni wakho njongo bani ofuna ukuyivezela uzulu mfokaMpofu?
TM: Engomeni zami ngijonge ukuvezela uzulu mayelana lokukhula kwami kanye lempilo engangiyiphila ngalesosikhathi. Okunye njalo ngijonge ukuveza impilo ephilwa emakhaya kanye lokukhuthaza ngokuqakatheka kokubambana empilweni.
CL: Njengomculi wandise ukutshayela ngaphi ingoma zakho njalo kungani uculela elizweni elingayisilo lakini?
TM: Ingoma zami ngandise ukuzitshayela kuma-shows atshiyeneyo noma nje khathesi ngingakazisi emsakazweni.
Kwesinye isikhathi ngizitshayela emtshadweni, emadilini okuzalwa kanye lakweminye imikhosi etshiyeneyo.
Okwenza ngiculele kweleSouth Africa yikuthi akudingi imali enengi ukuthi ukhiphe idlalade kulalapho useZimbabwe. Okunye njalo abantu bangapha bayawuthanda umculo njalo kulendawo ezinengi zokuthengisela umculo kulakithi okungelandawo zokuthengisela.
CL: Abantu bathini ngomculo wakho njalo ukhangelele ukubenzelani lonyaka?
TM: Abantu bayawuthakazelela umculo wami bathi ngiqhubekele phambili ngingadeli noma kunzima. Lokhu kungenxa yokuthi ngiyabajabulisa. Ngalokhu ngikhangelele ukubakhiphela idlalade kunyanga ezayo ngibuye ngibavakatshele endaweni ezehlukeneyo ngibazwisa ingoma zami.
CL: Ngaphandle kokucula msebenzi bani owenzayo jahelibanzi?
TM: Ngaphandle kokucula mina ngiyasebenza khonapha eSouth Africa ukuze ngithole imali yokuthuthukisa umculo wami njengoba kudinga imali kwezomculo.
CL: Emculweni wakho ucula ngesihlobo bani njengoba usazi indimi ezinengi?
TM: Mina ngicula ngesiNdebele kanye langesiTonga njengoba nje mina ngiliTonga. Lokhu ngikwenzela ukuthi abantu abanengi bawuzwe umculo wami njengoba lami ngikhule ngikhuluma isiNdebele lesiTonga.
CL: Bunzima bani oyake uhlangane labo njengomculi njalo nkuthazo bani oyipha abaculi abasasungula njengawe?
TM: Ubunzima engiyake ngihlangane labo yikuswela imali yokuzithuthukisa kwezomculo njengoba kudingeka imali.
Okunye yikuthi kwezomculo kudingeka isineke ukuze uphumelele ngakho abanye abantu oyabe ulabo basuka badele.
Kubaculi abasacathula ngithi kababambelele emculweni bengadeli ikakhulu nxa befuqwa yiziphiwo abalazo.
Ekuculeni lapha ngibakhuthaza ukuthi bengaculi ngoba bedinga udumo kodwa kabenze into eyisiphiwo kuphela ukuze bengadeli.
