uMthunywa
Ncekwenhle Ncube
INHLANGANISO ebona ngezokunikwa kwegazi elizweni lonke jikelele, iNational Blood Services Zimbabwe (NBSZ) isikhuthaze intsha esabelweni seMatabeleland North ukuthi iphatheke ekupheni igazi ngoba lilakho ukusiza labo abathe behlelwa zingozi labalidingayo.
UMnumzana Sifundo Ngwenya onguPlanning and Registration Officer kunhlanganiso yeNBSZ uveze lokhu ngemva kokutshayela isikolo seTsholotsho High ihlombe ngokuba ngesinye sezikolo esikhokhelayo ekupheni igazi esabelweni lesi.
UMnu Ngwenya uveze lokhu ngoLwesihlanu kuviki ephelileyo kumkhosi wokunika izipho kubafundi abenze kuhle eTsholotsho High.
Uthe intsha kumele iziphe umlandu wokuqhubekela phambili isipha igazi ngemva kokuqeda izifundo.
Kubikwa abantu abanengi esabelweni lesi kabaphi igazi okucatshangelwa ukuba kungabe kubangelwa yikuswela ulwazi ngokuqakatheka kokunika igazi.
UMthunywa uzwe ukuthi bonke abapha igazi okungaba ngamahlandla amahlanu baba lelungelo lokuthi baphiwe igazi mahala ngemva kwesikhathi nxa bona loba izihlobo zabo behlelwe yingozi.
UMnu Ngwenya ubuye wacacisela uzulu wonke nje jikelele ukuthi isiphala segazi lesi asijonganga ukuthi sigcwaliswe ngabafundi kuphela kodwa wonke umuntu oyisizalwane seZimbabwe uyavunyelwa ukwenza lokhu.
UMnu Ngwenya uthe kusiyaphela umnyaka kuzaba lomkhankaso ozaqhutshwa esidikidikini seTsholotsho ngenhloso yokukhuthaza abantu ukunika igazi.
“Sikhangelele ukuthi sibe lehofisi ezitolo zeTsholotsho lapho abantu abayabe bekhululekile ukuthi bayenika igazi ikakhulu ngesikhathi sekhefu lokuvalwa kwezikolo ukuze kungaswelakali igazi esiphaleni selizwe.
“Lokhu kuzenza labo abalesifiso sokusiza ngegazi bengathwali nzima ukuya edolobheni lakoBulawayo ukuze bayengezelela isiphala segazi,” kutsho uMnu Ngwenya.
Uphethe ngokuthi sebevule indawo ezifana lalezi endaweni ezigoqela ePlumtree Dingumuzi Hall, eNASSA Complex kanye leGwanda.
