uMthunywa
Sinanzelela isiNtu sithola ukuthi izolo abadala babelendlela yokubamba imikhuhlane, eyayihlasela abantu ngendlela ezitshiyeneyo. Abantu abelapha imikhuhlane babebizwa ngamabizo atshiyeneyo njalo ulwazi lolu olokwelapha baluthola ngendlela ezehlukeneyo. Lalamuhla siyananzelela ukuthi sekulabodokotela abelapha imikhuhlane etshiyeneyo labo bebizwa ngamagama atshiyeneyo. Akesikhangele abelaphi bakudala.
1. Abelaphi abalezinyoka — laba bayimihlobo etshiyeneyo. Inyoka zakhona zazivela ngendlela ezitshiyeneyo. (i) ngamaphupho umuntu elele ebusuku wayephupha etshengiswa izihlahla zokwelapha atshengiswe lendawo lapho azazithola khona. Ukuphupha lokhu kuqhubeka lasemini nje umuntu elele.
(ii) ukugula umuntu wayehlatshwa ngumkhuhlane aphatheke kabuhlungu engalapheki. Kodwa angaze afa. Indlela zonke zokuthi elatshwe zazizanywa kodwa kusehlula. Kwakuze kuthi inyanga ebonayo iliqambe idlozi umuntu athi nje khwatshu. Kwakulungiselelwa-ke ukuthi izinyoka ziphume.
(iii) ukuvala inzalo lapha ke abadala bathi idlozi laliphuza ukuphuma umuntu aze ayekwenda, omunye njalo wayethola umntwana oyedwa kube kuphelile. Kwakudingwa imbangela yalokho ingatholakali, kuze kuthi olesiphiwo esibonayo aliqambe idlozi. Umuntu lowo aphiwe izihlahla thize loba nje avuleke kungela sihlahla asiphiwayo.
Labesilisa labo babelalo lolohlupho lokuswela labo basile ngendlela efaneleyo.
