uMthunywa
silo Pumulani Mpofu
Ukuzalana kuyinto esiyiqakathekisayo esintwini sakithi njalo ubuhlobo siyabuqinisa. Indlela esiqinisa ngayo ubuhlobo yenza ukubana senelise ukusizana njengezihlobo kundaba eziphathelane lokwabiwa kwelifa, imitshado lokuthathwa kwencwadi zokuzalwa kwabantwana lapho abazali babo sebethe batshona.
Izihlobo zilakho ukusiza ukuze abantwana benelise ukuthola amalungelo abo afana lawokwaziwa, imfundo kanye lokugcinakala kuhle njengabantwana.
Umthetho welizweni lakithi sowenza kwaba lula ukuthi omama benelise ukuthathela abantwababo incwadi zokuzalwa nxa ubaba engafuni ukuthathela umntwana incwadi yokuzalwa (Birth certificate).
Lokhu sekuphathise kakhulu ukuthi abantwana baqhubeke bathola amalungelo abo lanxa abazali sebehlukene.
Kulezinsuku sebe banengi abantwana abakhula bengelabo oyise. Lokhu kuvame ukuthiu kubangele ukuba abantwana bengenelisi ukwamukela amalungelo abo ngoba abazali bengekho ndawonye.
Bakhona njalo abanye abazali abathi bangabona ukuthi kungenzakala ukuthi bakhulise abantwana bebodwa babaleke loba basuke baye emazweni akhatshana afana laseGoli betshiya abantwana bengalungiselwanga incwadi ezifaneleyo ezifana lencwadi zokuzalwa ukuze benelise ukuya esikolo. Inengi labazali abaya emazweni akhatshana litshiya lingalungiselanga abantwababo. Lokhu kudala ukuthi labo bantwana basale behlupheka ngoba abazali babo bengabalungiselanga izincwadi.
Kule iviki ngithole ithuba lokuxoxisana lomama othiwa nguMakhosini Dladla ohlala eCowdray Park. UMakhosini wazalwa lodade okuthiwa nguXolisiwe Dladla. UXolisile wazala abantwana abathathu uCaroline (21), uSamukeliso (17) kanye loJabulani (9). UXolisile wasuka waya eGoli esithi uyaphandela imuli yakhe kodwa wahamba waphulula etshiya izingane zakhe zingela ncwadi zokuzalwa. Abantwana laba bakubanga lokuya esikolo kodwa ngenxa yokuswelakala kwezincwadi zokuzalwa abenelise ukubhala imihloliso ebenza benelise ukuya kubanga elilandelayo.
Unina omncane, uMakhosini wavakatshela inhlanganiso yeTrinity Project ukuze enelise ukubana athathise lezingane njengesihlobo sikanina ukuze baqhubekele phambili ngemfundo yabo.
UMakhosini njengesihlobo sikanina uyenelisa ukuthathisa abantwana bomnawakhe izincwadi zokuzalwa. Okokuqala kumele ahambe ezibhedlela lapho okwazalelwa khona laba abantwana ayethatha amabirth confirmation record athole izincwadi zesikolo lapha abafunda khona abantwana ukuze kube lobufakazi bokuthi abalazo incwadi lezi.
Kumele aye emawofisini kahulumende ukuze abhadale imali engange$2 eyisigwebo sokuphuza ukuthathela abantwana incwadi zokuzalwa. UMakhosini kumele aye emapholiseni ayethatha amafinger prints ukuze kube lesiqiniselo sokubana uyisihlobo sikamama njalo akazi ukuba ntshontsha abantwana. Emva kwalokho usengaya koMsitheli lama-birth confirmation record, amakhadi abo ekilinika (health cards), isithupha sikamama kanye lesakhe lencwadi yakhe yokuzalwa ukuze kubonakale ukubana bayizihlobo. Uma elakho konke lokhu usengenelisa ukubana athathele laba bantwana izincwadi zokuzalwa.
Ngithanda ukutshayela uMakhosini ihlombe ngoba walandela izixwayiso zethu njalo sewenelisa ukuthathela abantwaba-kadadewabo incwadi zokuzalwa.
Inqobe ngiyitshiya kini, masingadubekisi abantwana bezihlobo zethu sithi ngoba onina bahamba kasibaphathiseni ukuze babe lekusasa elihle kungekho ukudubeka ngoba belakho ukusigcina kusasa.
Asihlanganeni njalo kuviki elizayo.
Ungangithinta kukheli ethi trinityproject6@gmail .com loba kunombolo zocingo ezithi 0773 195 055
