Omama yisiqokoqela kulo umhlaba

07 Oct, 2016 - 00:10 0 Views

uMthunywa

Ekukhuleni kwami ngananzelela ukubana umama wayeqakathekile kakhulu ezimulini.

Kudala kwakujwayelekile ukubana ekuthathaneni kwabazali ubaba ayehlala edolobheni  kuthi umama asale ekhaya esakha umuzi njalo esale ekhulisa abantwana. Umama wayesala abagcine ebafundisa umthetho oqinileyo kuthi lapho ubaba esebuya athole umuzi usuvuthiwe.

Lokhu kwakuveza sobala ukubana umama uyisiqokoqela empilweni zethu njalo uyenelisa ukubana athathise abantwana bakhe incwadi zokuzalwa eyedwa njalo ulakho ukubakhulisa eyedwa laloba ubaba engasekho njalo azigcine kuze kufike isibanga sokuthi abantwana sebekhulile sebengazimela bodwa. Indlela omama abazigcina ngayo kwenza uHulumende wabona kufanele ukubana omama baphiwe ilungelo lokuthathisa abantwababo incwadi zokuzalwa laloba bebodwa obaba bengekho njalo isihlobo sikamama silakho ukuthathisa umntwana incwadi yokuzalwa. Kodwa-ke ubaba ngeke akwanise ukuthathela umntwana incwadi yokuzalwa umama engekho.

Kulezinsuku sokujwayelekile ukubana  obaba bayaphika imithwalo lapho omama sebethe babamba isisu. Izikhathi ezinengi omama sebesala bezikhulisela abantwana babo obaba sebethe bahamba baphulula elizweni laseGoli.

Inengi labobaba litshiya abantwana bengakazalwa njalo bengakathathelwa incwadi zokuzalwa. Inengi labomama lisebenza gadalala ukuze lithole ukuziphilisa labantwana njalo benelise ukubana bebaphe ikusasa elihle njalo elihlelekileyo. Kuzathi-ke lapho sevuke ekhumbule ekhaya ubaba abuye athole ingane sezikhulile sezibiza umama.

Lapho-ke ubaba sebona ukuthi abantwana sebebiza umama ulakho ukukhipha imali engange $50 aye kumeli amsize ukubana antshintshe aye kusibongo sikayise.

Kule iviki ngithole ithuba lokuxoxisana lodade okuthiwa nguKhanyile ohlala elokitshini laseEntumbane. UKhanyile wayethandana lobhudi okuthiwa nguSibusiso. Bathandana kwabakuhle uKhanyile wacina sebambe isisu. Wabuya-ke uSibusiso wazovuma amacala akhe wathembisa ukubana uzakuya eGoli ayesebenza ukuze athole imali yokulobola njalo alungiselele ukuzalwa komntanakhe .USibusiso wahamba-ke eGoli waqala esabatshayela ucingo kwaya wacina esethule zwi.

UKhanyile wasala ehleli yedwa waze wacina sebelethile indodana yakhe wazikhulisela yona. UKhanyile weza kithi njengogatsha lweTrinity Project Trust ngoba engazi ukubana uyakwanisa ukuthathela indodana oyakhe incwadi yokuzalwa eyedwa. Kuyabe kufunakala i-birth confirmation record, i-health card, incwadi yokuzalwa kamama lesithupha sakhe kuphela. Ngiloba nje uKhanyile wenelisa ukubana athathele indodana yakhe incwadi yokuzalwa.

Njengoba uKhanyile esekolitshini yobutitshela koBulawayo uzenelisa ukubana akhulise indodana yakhe njalo enelise ukubana amenzele konke okudingekayo njengomntwana.

Bomama singadeli nxa sesitshiywe ngobaba  njalo sihlale sigcine abantwana bethu sibaphe ikusasa elihle njalo elihlelekileyo. Siphinde njalo sihlangane ngeviki elizayo.

Umlobi uthinteka kukheli elithi [email protected]  loba kunombolo ezithi 0773195055

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds