uMthunywa
Ncekwenhle Ncube
NJENGOBA isikhathi sezulu sesifikile kuchaza sobala ukuthi izinga lokugugudeka komhlabathi lizakhwela ngakho abalimi bakhuthazwa ukuthi balime utshani obubizwa ngokuthi yiVativa ukwenqabela ukugugudeka lokhu ngoba impande zabo lobutshani zilusizo kakhulu ekuxotsheni amawuwu emkulwini.
Utshani lobu bufana loqethu. Buyanaba bugcwale indawo yonke besekusithi impande zabo ziyabamba umhlabathi lamanzi okwenza umhlabathi ungagugudeki.
Nxa utshani lobu bulinywa kumele umlimi atshiye izikhexe ezingaba yi2cm phakathi ngoba impande ziyanaba zigcwale indawo enkulu.
Ngaphandle kokuvikela ukugugudeka komhlabathi impande zotshani lobu zilusizo kakhulu ezivandeni ukuxotsha izibungwana ezidla izilimo kanti njalo lasemikulwini impande lezi ziyaxotsha amawuwu.
UMnumzana Mthobi ongumlimisi uthe utshani lobu bungaba lusizo olukhulu kubalimi ngoba buyaphathisa ekubambeni umhlabathi lokuxotsha imihogoyi.
“I-Vativa le kumele abalimi abanengi bayidinge bayihlanyele ezivandeni zabo. Ilusizo olukhulu ekubambeni umhlabathi ngempande zawo ukuthi ungathathwa ngamanzi.
“Utshani lobu buyasebenza kakhulu ekuxotsheni izibungwana ezihlasela imibhida lezinye izilimo ezivandeni.
Bulakho futhi ukusiza ekulwiseni amawuwu emkulwini njengoba bungathandwa yizibungu lezi.
“Phezulu kwalokhu utshani lobu buyasetshenziswa ngabantu abazingcitshi ukweluka amacansi. Okutsho ukuthi lokhu kubalusizo ngendlela ezehlukeneyo,” kutsho uMnu Ndiweni.
Uqhubekele phambili ekhuthaza izakhamizi ukuthi zibambisane ukudinga utshani lobu buhlanyelwe eduze lamadamu ukuze kuthi nxa izulu lisina inhlabathi egugudwe ngamanzi ingangeni igqibele amadamu lawa.
Abafuya inkomo bangasebenzisa utshani lobu ukwendlala ngabo ezibayeni ngesikhathi somqando. Kanti njalo kuba lomquba lomquba omuhle nxa bungavundiswa utshani lobu.
Abalimi bengasika utshani lobu ukwendlalela inkukhu zokufuya ukuze zingabulawa ngumqando.
