uMthunywa
Nobuhle Mgwaqo
OBEMELE uMongameli welizwe uKhomuredi Emmerson Mnangagwa useveze ukuthi izinduna zakithi kumele zihlonitshwe kungakhathalekile ukuthi zinganani ngoba zilomsebenzi omqoka emphakathini kanye lakuzigaba esivela kuzo.
Uthe kulomthetho omutsha ozaveza ukuthi iholo lezinduna akumelanga liqunywe.
Uthe isisekelo sombuso welizwe esitsha sibeka sobala isithunzi sezinduna, umsebenzi wazo, kanye lokuthi zisebenza njani ngenhloso yokukhusela ubuntu kanye lamasiko ethu.
UKhmrd Mnangagwa onguMphathintambo wogatsha olubona ngezomthetho olweJustice, Legal and Parliamentary Affairs uveze lokhu kumkhosi wokuqaphelisa izizalwane zakuleli ngokumunyethwe kusisekelo sombuso welizwe ngoLwesine kuviki ephelileyo koBulawayo.
UKhmrd Mnangagwa uveze ukuthi iSahluko 5 sesisekelo sombuso welizwe sichaza kabanzi ngezinduna zakithi.
Uthe lanxa njengabantu sisazi ukuthi omncane kumele ahloniphe omdala kodwa-ke abadala labo kumele bahloniphe omncane nxa engumkhokheli.
“Endulo sasisazi ukuthi omncane kumele ahloniphe omdala kodwa nxa sesikhuluma ngezinduna zethu kulomehluko.
Induna ingaba ncane ngokweminyaka yokuzalwa kodwa kumele ihlonitshwe kunjalo ngenxa yogcobo lwayo lokuba yinduna. Kazihlonitshwe kuphela,” kutsho uKhmrd Mnangagwa.
Uthe kukanengi kusiba lokudonselana nxa sokukhethwa izinduna ikakhulu ezabelweni zeMashonaland kodwa lokhu sebekuqondise ngokuthi kubizwe induna eziseduzane ziphathise ekukhumisaneni umlotha.
“Eminyakeni edluleyo besisithi izikhulu ezisebenza kugatsha lweLocal Government zichwayisise ngendaba zokudonselana isihlalo kodwa lokhu bekusiba nzima ikakhulu endaweni zaMaShangani lapho indlu yinye ngayinye okumele ibe lethuba lokuthi ikhokhele.
“Kungakho-ke saba lomqondo wokuthi ezinye induna eziseduzane ziphathise ekukhumisaneni umlotha nxa kulokudonselana ukuze kukhethwe induna efaneleyo,” kutsho Khmrd Mnangagwa.
UKhmrd Mnangagwa uphinde njalo waveza ukuba uMongameli welizwe uKhomuredi Robert Mugabe usevule ugatsha olutsha olubona ngokuthuthukiswa kwezigaba, ukulondolozwa lokukhuthazwa kwamasiko kanye lamagugu (Rural Development, Preservation and Promotion of Culture and Heritage) olukhokhelwa nguKhomuredi Abednico Ncube oluyilo osolukhangela ngokuphathwa kwezinduna.
Uthe kuBhili (Bill) entsha yezinduna abakhangelele ukuthi kusiyaphela ihlandla lesine lePhalamende yesitshiyagalombili iBill le ibe isingumthetho.
“ITraditional Leaders Bill ikhuluma ngokuholiswa kwezinduna kanye lenzuzo yazo. Ngaphandle kwalokhu umthetho lo uzabona ukuthi iholo lezinduna kaliqunywa,” kuphetha uKhmrd Mnangagwa.
