uMthunywa
Johas Moyo
KUSIGA esihlasimulisa umzimba esitshiye izakhamizi zeSigumba eSilobela ziphethe izibindi ngezandla kulabathakathi ababanjwe xhaka bephanda ingcwaba abanye bacela ezinyaweni bephethe umlenze wesidumbu, uMthunywa ukuzwile lokhu.
Indaba le esegudwini yenzakale kumaviki amabili adluleyo esiqintini esingaphansi kwenduna uMalisa.
Kuzwakale ukuba abankukhuli laba babebane lanxa kwabanjwa ababili ngalelolanga engcwabeni bephethe izitho zomuntu.
UMthunywa uzwe njalo ukuthi abathakathi laba baveze njalo ukuthi bakujayele ukuphanda amangcwaba njalo sebelesikhathi eside bekwenza.
Kuzwakale ukuthi abantu laba sekulendawo eziyisikhombisa lapho asebagebha khona amangcwaba.
UMthunywa uxhumane loThamsanqa Msimanga oyisakhamuzi sakuleyo ndawo oveze ukuthi ungomunye walabo abafika kuqala ngelanga kuze kubanjwe abakhunkuli laba.
“Savuka ngovivi ngalelolanga abakhunkuli laba sebebanjiwe engcwabeni lanxa abanye bakhona bahle babaleka ngaleso sikhathi.
“Okumangalisayo yikuthi labo ababalekayo babethwele umlenze womuntu njalo ludaba olwathoniswayo lwehlula kubosobhuku ehlangene lezinduna,” kutsho uMsimanga.
Uqhubekele phambili waveza ukuthi abantu labo ababanjwayo ngabantu asebekhulile njalo abahlonitshwayo esigabeni.
“Okudanisayo yikuthi abantu laba ababeganga ngabantu abadala abahloniphekayo esigabeni abangeke bacatshangelwe into enjalo. Okwangizwisa ubuhlungu yikuthi sebebuzwa baqambana ngobungane babo baze badlula isithupha njalo baveza ukuthi zinengi izidumbu abazidlayo ngemva kokungcwatshwa,” kutsho uMnu Msimanga.
UNkosikazi Lindokuhle Sibanda laye okhulume loMthunywa ngaloludaba uveze ukuthi balokhe bedidekile njalo belenhloni zokukhangelana labomakhelwane ababanjwayo.
“Lakhathesi lokhu sisehluleka ukukhangelana labantu laba ababanjwayo ngoba nxa umbona engqondweni kufika izenzo zakhe ezimbi.
“Okudanisayo kakhulu yikuthi labantwana abancane sebelwazi udaba lolu okwenza kubenzima lokuthi umntwana umthume edlule kuleyondawo ngoba ecabanga ukuthi uzabulawa,” kutsho uNkkz Sibanda.
Omunye njalo umfakazi oqotho ongathandanga ukuqanjwa ngebizo ubikele uMthunywa ukuthi kuliqiniso ukuthi kulabakhunkuli ababanjwa besidla isidumbu.
“Kuliqiniso sibili ukuthi kulabakhunkuli ababili ababanjwayo besidla isidumbu njalo abanye bakhona ababili babaleka bephethe umlenze. Langesikhathi bethoniswa kabazange bakulandule lokhu, baveza ukuthi bahlala bekwenza,” kuchaza umfakazi lo.
UMthunywa uxhumane lenduna yesigaba uMalisa othe indaba le kayikafiki endlebeni zakhe.
“Kangiluzwanga udaba olunjalo. Ngiyaqala nje ukukuzwa ngawe lokho ngoba kangithembi ukuthi esigabeni sami kungenzakala into enjalo. Ngibona ngani ngabantu abazama ukungcolisa indawo yami,” kutsho induna uMalisa.
