uMthunywa
Fairness Moyana
BABUKELE ibhayisikopo yamahala emthethwandaba weHwange ensukwini ezisanda kwedlula ngemva kokuba omunye usomabhizimusi obesetheswa icala lokutshaya omunye usomabhizimusi eyale wemba phansi ukubuyela esitokisini ethi imiyane iphose yambulala.
Usomabhizimusi lo, uAnthony Kalasselos oleminyaka yokuzalwa engu-51 umiswe phambi komthethwandaba esetheswa icala lokuncweba uNkosikazi Tarry Leign Fynn ngemva kokwehluleka ukumbhadala isikwelede sakhe.
Umsolwa ubelele esitokisini lapho alunywe khona yimiyane njalo wahle wacela uxolo engakabuzwa ukuthi uyalivuma kumbe hatshi icala lakhe.
Umsolwa uthe kumantshi uRose Dube;
“Nkosi, bengisesitokisini lokhu ngibotshiweyo izolo, imiyane isingibulele phakathi. Ngicela ungiphe ithuba lokuyabethwa ngumoya njalo ngiyephumula ngizaziphatha kuhle ngiyathembisa,” kutsho Kalasselos.
Kusenjalo wehluleke ukuzibamba umantshi Esesithi ayevalelwa ejele elindele ukuthoniswa kwecala lakhe ethi inkundla yenze isinqumo esingafanelanga.
“Nkosi, isinqumo sakho sokuthi ngibuyele ngiyevalelwa kasifanelanga ngitsho,” kutsho umsolwa ekhwaza ngesikhathi izikhulu zejele (ogadijeli) zimdonsela esitokisini.
Umantshi uphinde njalo wamkhulula wathi ayehlala lomnewabo ukuze ahambe laye kubodokotela bengqondo ukuze kubonakale ukuthi uphatheke kuhle ngaphambi kokuthoniswa kwecala leli.
Inkundla izwe ukuthi mhlaka 10 Ncwabakazi emgwaqweni uMahogany elokitshini leBaobab eHwange umamangala wahlangana lomsolwa wasembuza ngesikwelede sakhe.
Kubikwa umsolwa watshengisa umamangala i-tablet phone ayeyithengisa andubana umamangala amthathele athi uzamnika angabhadala isikwelede sakhe. Lokhu kakuzange kumphathe kuhle umsolwa owancweba umamangala esenzela ukuthi atshiye umakhalekhukhwini wakhe.
Umamangala wavuvuka isandla ngenxa yokuhlukuluzwa lokhu akwenziwayo kungakho wahle wayabikela amapholisa abopha umsolwa.
Umtshutshisi kulelicala bekunguMnumzana Onias Nyathi.
