uMthunywa
Nobuhle Mgwaqo loNcekwenhle Ncube
KUSIGA esingundabamlonyeni elokitshini elidala leMakokoba kuleloja eselitshise izindlu zabomasitanda balo ezine zisitsha ngendlela engazwisisekiyo, uMthunywa ukuzwile lokhu.
Kubikwa iloja leli okutholakale ukuthi nguFikelephi Nkomo elingumZayoni kubandla leJerulasema angaloja endlini iyatsha noma kanjani.
Okuhlasimulisa umzimba ngamashwa alandela uFikelephi Nkomo ongumZayoni kubandla leJerusalema yikuthi angaloja endlini yakho icina itshile kuphela njalo umlilo otshisa izindlu zabantu kawaziwa ukuthi ubangelwa yini kodwa zikhathi zonke uqala phakathi kwewadilobhu (wardrobe) njalo ubonakala impahla sezitshe zaphela.
Kuzwakale njalo ukuba iloja leli lake lahlala elokitshini leMzilikazi lasuka litshise indlu, laya eMakokoba eSiphambaniso lapho okwaphinda kwenzakala indaba efanayo.
Kubikwa lathutha njalo kuleyondawo layahlala kwenye indlu elokitshini elifanayo layo esitshe kabili kunyanga eziyisithupha.
UMthunywa uzwe ukuthi isimanga ngokutsha kwezindlu lapho okuhlala khona iloja leli yikuthi kuqala kutshe iwadilobhu yeloja leli lanxa umlilo lo bephanga bawucitshe kodwa ngelanga elilandelayo kutsha iwadilobhu kamasitanda iphele ithi nya.
Kuvele njalo ukuthi izicitshamlilo (fire fighters) zala ukutshiya incwadi yokuthi umasitanda ayebhadalela ukucitshwa komlilo kuleyondlu bathi kabalungise into zabo.
UMthunywa uxoxisane lomunye umakhelwane walapho iloja leli elake latshisa khona othande ukwaziwa ngokuthi nguDumie nje kuphela waveza ukuthi kulomoya wokutshisa izindlu zabantu olandela iloja leli.
“UMaNkomo asazi sibili ukuthi ulandelwa ngumoya bani ngoba zonke indawo lapho ahlala khona kuyatsha.
UMaNkomo uke wahlala komakhelwane wami uErisa Mhlanga kwatsha futhi khonapha ku8th Street.
“Kungenzakala ukuthi umama lo bamdlulisa abantu, kanti njengoba nje esonta esontweni yomoya pho kungani umoya lo bengawukhuphi,” kutsho uDumie.
Elinye ipholisa lesigaba elixoxe loMthunywa elingathandanga ukuqanjwa ngebizo liveze ukuthi indaba le bayayazi njalo iyabadida.
“Indaba yomlilo yindaba ekhulunywayo lapha, indlu iloja leli ehlala kiyo ike yatsha ngenyanga kaMbimbitho nanko siphinde njalo yatsha okutshengisa ukuthi kukhona okutshaya amanzi mpela.
“Okunye njalo okumangalisayo ngokutsha kwezindlu zonke lapho okuhlala khona iloja leli yikuthi uqala endlini weloja leli kuwadilobhu kodwa benelise ukuwucitsha kukanti uthi nxa usutshisa iwadilobhu kamasitanda ubonakala impahla sezitshe qhu,” kulandisa ipholisa leli.
Ipholisa leli liqhubekele phambili labikela uMthunywa ukuthi inina leli nxa lithutha lisiya kwenye indlu lihlala lilempahla ezintsha.
“Okunye okumangalisayo yikuthi sizwa kuthiwa nxa ezongena endlini uhlala elempahla ezintsha kuphela mhlawumbe ngumuthi wakhe,” kutsho ipholisa leli.
UMthunywa wenelise njalo ukuxhumana laye uNkszn Nkomo waveza ukuthi kuliqiniso ukuthi izindlu zonke ahlala kizo ziyatsha kodwa uthe kakwazi ukuthi zitshiswa yini.
“Kuliqiniso sibili ukuthi izindlu zabantu ziyatsha kodwa zitsha ngingekho. Kwake kwatsha ngihlala epulazini (eplothini) eMzilikazi, kwazokutsha njalo sengihlala eSiphambaniso lakhonapha ku8th Street.
“Into le iyangijuma sibili njalo yenzakala ngesikhathi ngingekho, nxa ngikhona endlini akutshi.
“Kuze kutshe okokucina ngangisekilinika ngihambise umzukulu wami. Lakuqala kuze kutshe ngisahlala epulazini eMzilikazi ngangisesontweni,” kuchasisa uNkszn Nkomo.
Uthe kuze kutshe ngenyanga kaMbimbitho babehlezi phandle emthunzini.
Ebuzwa ukuthi kungani abebandla lakhe bengamncedisi ukukhipha umoya lo uthe bamncedisa ngemithandazo.
“Abazalwane bancedisana lami emthandazweni ukuthi umoya lo ungitshiye kodwa kwala, usungithwalise nzima,” kutsho uNkszn Nkomo.
UMgcinisihlalo weBulawayo Residents Association (Bura) kuWadi 7 uMnumzana Raymond Gombedza uvumile ukuthi indaba le wayibikelwa ngumninindlu.
“Umninindlu wabuya wazongibikela ngokutsha kwendlu yakhe wacela njalo ukuthi simncedise njengababona ngezakhamizi ukuthi umama lo asuke endlini yakhe kumaviki amabili edluleyo.
“Kuliqiniso njalo ukuthi sekutshe izindlu ezintathu; eMzilikazi, eSiphambaniso kanye lakhonapha ku-8,” kutsho uMnu Gombedza.
Uqhubekele phambili wathi usesesaba njalo lokumdingela indlu yokuhlala.
“Umama lo wasicela ukuthi simncedise ukudinga indlu yokuhlala kodwa lathi sesisesaba ukumdingisa ngoba asazi ukuthi kuzenzakalani endlini elandelayo,” kuphetha uMnu Gombedza.
