uMthunywa
MTHWAKAZI kaNdaba abaziyo babethi nxa bejabule bethi kukhona ababethi kayibulawe ngakho kayisoze ibulawe.
Yiyo kanye iBosso abayabe bekhuluma ngayo. Akwaziwa ukuthi ngobani ababethi kayibulawe kanye lokuthi kwakutheni beze betsho njalo. Yilo-ke iqembu likanobhutshuzwayo elivuka ubhedu kulezinsuku.
Angithi eminyakeni embalwa edluleyo iTshilamoya kade isibangwa lezibi kungelamuntu obelethemba lokuthi izafa yawutshila njalo umoya. Angithi lamaqembu asakhasa kade evukela kiyo nje kungabi ndabazalutho. Bekunjalo endulo sibili kodwa ngenxa yokuthi kusinwa kudedelwana sokujikile. Amahlolanyama sevuke okwawo.
Kwathi ngesikhathi kuhamba abadlali beBosso inengi lathi yetshwa, licabanga ukuthi yikho ukuwa kwayo kanti yikho ukuvuka kwayo. Yahlehlela nyovane okwenqama isiyathatha amandla nxa idibane lenkunzi. Ithe ivuka njalo yaqala ukwenza iziga ukuyikho esikubheke ngamehlo kulezinsuku.
Emavikini amabili adluleyo iBosso ibhuqe iBorder Strikers sathi yebo sibonile. Yakwenza njalo kuviki ephelileyo yadibana leDeMbare emagumeni khonapha koBulawayo kwabaluthuli lothudlana qede yehlulwa iDeMbare. Kuthe kunjalo kuyonale iviki futhi idibane njalo leMutare City baginqa amazwane abafana beMutare City sebegade phezulu kwabo abafana beBosso.
Kulezinsuku abalandeli beBosso bajanqula kube luthuli nxa bebona iqembu labo linqoba kanje. Abanye ngabathi sebeyithethe kudala iligi yalonyaka, asazi ukuthi bengabe behumutshe ngokweqiniso kumbe ngamalimi ezansi nje.
Kunjalo phela abantu babethi bengajabula kakhulu bahle babone lekusasa lifana lamhlanokho. Kakho okwaziyo ukuthi ikusasa lisiphatheleni. Kungenzeka kube nzima kwelinye iqembu kuze kuhele kozeleyo.
Yebo kambe kungaba nzima kwamanye amaqembu kodwa kuBosso kukhanya kudala iyitshayile intambo ngoba sichaphe iziziba ezesabekayo sokusele amazibuko nje. Singazi njengoba kwesinye isikhathi abanye basuka bagalule emazibukweni la esikhuluma ngayo. Noma kunjalo ayisibo bonke abagalulayo, abanye bachapha kungabi ndabazalutho.
Kulezinsuku kwakuthi nxa kudlala iTshilamoya uthole kungezimnyama lezimhlophe idolobho lonke bakithi kuluthuli.
Ovuvuzela laba angikhulumi bayabe beduma ngapha langapha ungaze uthi mhlawumbe kukhona okuzovela mhlanokho. Abanye bathaba kakhulu baphethe belala sebesezandleni zomthetho. Labo abadliweyo angikhulumi ngoba bazonda baginqe tshitshi angani bengadla umgaxa ngenxa yolaka.
Abanjalo labo abalutho ukulala emajele ngoba bavame ukudumelana lalabo abazijabuleleyo kube nzima. Kwesinye isikhathi uthola ukuthi nxa iBosso idle iDeMbare abalandeli beDeMbare bazonda baze bazondele ngitsho lemuli zabo ezindlini khonapho zingazi lutho. Injalo phela siqalile eyayikwenza kudala. Abanye bathi isivuke khwatshu kuthi abanye bazitshela ukuthi ngumlilo wamaphepha. Esingakutsho okwakhathesi yikuthi siyibona isidla ubhedu kuphela kakho okwaziyo ukuthi izaphetha ngani.
Kwakuthi nxa kunjalo kunqoba amanye amaqembu abalandeli beBosso bengadeli bale besiyakhona. Izimpi emdlalweni yebo zazibe khona kodwa umsizi ngowembiza zonke okuyikuthi lamanye amaqembu awaze ajabula nxa engasanqobanga kuhle ngoba akujabulisi khona.
Mthwakazi kaNdaba kwelinye ilanga kuzabe kubheda iTsholotsho njengoba khathesi kusaseyisikhathi seBosso.
Ngalesosikhathi bazajabula-ke abalandeli bayo kube nzima. Kusinwa kudedelwana kodwa okwamanje isatshaya eyayo ingquzu iTshilamoya.
