uMthunywa
Siqhubekela phambili sikhangela impahla zokuhlala ezesintu sinanzelela njalo lokuthi impahla lezo zenziwe ngani.
1. Icansi lenqodi — inqodi isitshunwa emfuleni, yona-ke iqatha kulemizi njalo kayiqinanga njengemizi. Icansi lenqodi liyahlaba abanye benza okokuhlanganisa lemizi ukuze kuhlaleke kulo kehle.
2. Icansi lomcobosi — umcobosi butshani bokweluka amacansi lengcebethu. Utshani lobu abuqinanga bephuka lula, yikho nje amadoda engalendlali icansi lomcobosi ngoba kuthiwa labo bazakuba buthakathaka njengomcobosi.
3. Icansi lencema — butshani obukhula emifuleni, buqinile njalo butshani obuhle okwamagama. Utshani lobu beluka amacansi amahle aqandelelayo kamnandi kakhulu ngesikhathi sokutshisa. Ekadeni intombi yayikhuthazwa ukuthi lapho isiyakwenda ibelecansi lencema ozakuthi nxa umkayo eziphumulele emthunzini alale phezu kwalo.
Kesikhangele indlela yokweluka amacansi la. Utshani bonke obuyimihlobo buyathanjiswa ukwenzela ukuthi bube buthakathaka. Imizi yakhona loba ubutshani obuthile belukwa buphambene kusenzelwa ukuthi lilingane nhlangothi zombili. Nxa kuselukwa intambo yangaphansi iphambana leyaphezulu ukuze kudonseke kuqine. Imizi idojwa lunye ngalunye kuselukwa ngalolohlobo. Nanzi indlela zokweluka, ngamagama asetshenzisiweyo:
a) Amabanga yikweluka okutshiyelane isibanga esincinyane.
b) Umdabulo yikweluka okutshiya umkhandlo omkhulu phakathi kwamabanga.
c) Umqhayo yikweluka ngemidabulo yodwa, icansi liphethwa ngokwelukelwa eduze kucabanga elicinileyo anduba kuqunywe imizi esemphethelweni.
