uMthunywa
Ncekwenhle Ncube
NGESIKHATHI ababalisi besikolo seNyathi High bematasatasa ngokulungiselela usuku lokupha abafundi abenze kuhle ezifundweni zabo kanye lakwezemidlalo imivuzo, ababengabafundi bakulesisikolo kanye labazali sebeveze ukuthi bazanika isikolo lesi isipho sebhasi.
Umkhosi lo kubikwa uzakubakhona mhlaka 8 kunyanga ezayo esikolo lesi kusukela ngehola lesificamunwe munye ekuseni.
Ekhuluma loMthunywa ngosuku lolu, uMphathisikolo uMnumzana Nkululeko Zidla uchaze ukuthi lokhe beqale ukulungiselela umkhosi lo akabuquthi ubuthongo ngoba befuna kube lilanga elimnandi njalo elizenza bonke abanxusiweyo bajabule.
“Thina njengababalisi silala siquthile njengoba amalanga esesondele. Sifisa ukuthi usuku lolu lube luhle kakhulu njalo lube lenkuthazo enkulu ezakhanga ababengabafundi kulesisikolo bazizwe belomlandu kungqubelaphambili yesikolo sethu.
“Ngosuku lolu sikhangelele ukuthi umfundi oyenze kuhle aphiwe umvuzo abantwana bonke bekhangele. Lokhu kuzenza ukuthi labo basebenze nzima ukuze baphiwe izicoco.
“Ngaphandle kwalokho kuzenza imfundo yethu lezinga lokuphumelela liqanse,” kuchaza uMnu Zidla.
Intatheli izwe ukuthi ngalolusuku olukhulu izakhamizi labanye ababengabafundi eNyathi bazimisele ukuthi baphe isikolo sabo isipho sebhasi ezancedisa isikolo nxa besiya emidlalweni lakho konke nje okuzabe kuyindingeko esikolo.
Ebuzisiswa ngaloludaba umphathisikolo uthe lokhu kuzenzakala kodwa okwakhathesi ngeke akhulume okunengi ngoba amalungiselelo awakafiki emaphethelweni.
“Kuliqiniso ukuthi ibhasi isithengiwe njalo amathuba aphezulu ukuthi ngalelilanga sizabe siyiphiwa kodwa angikabi leqiniso lokuthi sekulungiselelwe okunganani,” kuchaza uMnu Zidla.
Iphephandaba lizwe ukuthi ozabe engumhlonitshwa kulo umkhosi nguNkosikazi Sithokozile Ndlovu ongomunye wabafundi abaqeqetsha esikolo lesi.
Umphathisikolo uphethe ngokunxusa bonke abazabe bekhululekile ngalolusuku ukuzoxhasa abafundi abenze kuhle kanye lokuzojabula labanye abanxusiweyo.
