uMthunywa
Lami ngiyamfuna umntwana
KHULU nginceda kuhlupho engilalo. Mina kangandisanga ukuzwa ubuhlungu emzimbeni kodwa ngiyehluleka ukubamba isisu. Sengidinge ngaswela ukuthi uhlupho kuyini ngoba sengilesikhathi eside ngihlala lendoda. Ngenzeni Khulu?
Impendulo
Inengi labazukulu abanjengawe kabandisanga ukuhlutshwa yikuzithwala kodwa kuyenzakala ukuthi kube kulohlupho. Isisu kuyenzakala ukuthi sale ukubamba nxa kulezinto ezingahambi ngendlela emzimbeni. Kukanti ezinye inhlupho zibangelwa yimoya emibi ehlasela abantu. Kwezinye njalo izikhathi okwenza umuntu aswele inzalo yikuphuza ukwelatshwa imikhuhlane ethelelwana emacansini ngoba lokhu kulimaza indawo okuhlala khona iqanda kusiya esibelethweni. Kuyenzakala njalo ukuthi kucine kusiba lezikhala ezibangelwa yimikhuhlane le. Kungakho indoda elenhlanyelo engaqinanga kusuka kubelukhuni ukuthi inhlanyelo yakhe iyefika esibelethweni. Kubalulekile-ke ukuthi ungabona ulohlupho ungathandabuzi ukuyavakatshela udokotela, kumbe ukuya ekilinika loba esibhedlela ukuze welatshwe. Kuyenzakala njalo ukuthi abanye bathathe impahla yakho yangaphansi bayilungise, lakho kwenza wehluleke ukubamba isisu. Ingozi kanye labondofa lakho kuyabangela ukwehluleka ukuzithwala. Kungakho inengi lalezi imbangela zidinga ukuthi ubonane lengcitshi ezizakuhlola zibone ukuthi kuyini okubangela lokhu.
Ngilamaqhubu alumayo
Khulu ngilohlupho lokuphuma i-discharge engcolileyo njalo enengi kakhulu okwenza kwezinye izikhathi ngicine ngimanzisa impahla zangaphakathi. Phezulu kwalokho ngiyalunywa kudade kucine kusiba lamaqhubu. Sengidubekile Khulu nginceda.
Impendulo
Mzukulu uhlupho lokuphuma kwamanzi anukayo esithweni sangasese kanye lokulunywa ngumkhuhlane. Okwenza ucine usiba lamaqhubu alumayo kutshengisa ukuthi ule-fungal infection. Umkhuhlane lo nxa ungekela ukwelatshwa uyalimaza isibeletho kanye lemithambo okuhamba kiyo amaqanda okwenza owesifazane lowo acine esiba lohlupho lokuzithwala. Ukukhipha ingcekeza kudade kungabe kusitsho njalo ukuthi isibeletho kanye lemithambo le sekulimele. Umkhuhlane ofana lalo ulakho njalo mzukulu ukuthelelwana emacansini. Bakhona abathi nxa besenza iromensi badlane izitho zangasese bacina besiba lomkhuhlane we-oral trush elakho ukucina isiya esiswini umuntu abesesiba lomkhuhlane wesihudo. Kungakho lo ngumkhuhlane omubi kakhulu odinga ukuthi welatshwe ngudokotela ngoba isifo lesi kaselatshwa ngemihlobohlobo yemithi.
