uMthunywa
Pumulani Mpofu
Uthando lona luyinto enhle. Ngoba phela lebhayibhili liyaveza ukuthi uthando luyisipho esikhulu kulazo zonke.
Akula lutho ongalwenza kuyikuthi awuluthandi kumbe ungelathando lalo.
Omama bethu bengelathando ababelalo besikhulisa angiboni ukuthi babengasiyenzela izinto ezitshiyeneyo lezinyanyisayo ezifana lokusintshintsha izitshubo lokusifinya amakhovula.
Kungasithando angiboni ukuthi babengenelisa ukulala bekhangele sigula, siloba imisebenzi yangekhaya esasiyiphiwe ngamatitshala ethu esikolo.
Kuyafana lamajaha asezimisele ukuthatha, nxa kuyikuthi intombi leyo ayithandayo sefuna ukuyithatha uyazama imizamo yonke ukuthi ayevela.
Kungangcono nxa kuyikuthi imali yakhe ayihlangani aboleke kuyise inkomo kumbe lemali ebanganini.
Ngoba phela nxa kulomuntu osumthandile uyazama ngamandla akho onke ukuthi ufeze isithembiso oyabe usenzile.
Angiboni futhi ukuthi asebefunda baqeqetsha bazebaba ngodokotela labo-proffessor babengenelisa ukuthi bafunde bafike lapho abakhona bengakuthandi lokhu ababekufundela esikolo.
Engikutshoyo yikuthi nxa ulutho uluthanda kulula ukuthi ubekezele uze uthole leyo mpendulo oyabe uyikhangelele.
Sengixoxisane lomama wakoLunga uPromise phose okwezinyanga ezimbili, ngimxwayise ukuthi engenza njani ukuthi athole incwadi yokufa komnawakhe uPrimrose oseleminyaka emihlanu wabhubha.
UPrimrose wayelomtwana okuthiwa nguSally, owamthathela incwadi yokuzalwa ngesibongo sakhe.
Wayethandana lobaba wakoNcube okweminyaka eyisitshiyagalolunye andubana adlulele enkosini uPrimrose.
Njengoba uPrimrose wayefele endlini kaNcube, uNcube wakhulumisana lobaba kaPrimrose ngamalungiselelo omngcwabo bahamba bonke bayathatha i-burial order.
Abantu abasebenza koMsitheli bathi bebuza ukuthi uPrimrose wayethethwe uyise wathi ye, bahle babhala ku-burial order ukuthi uPrimrose wayetshadile.
Aqhubeka-ke amalungiselelo omngcwabo,wangcwatshwa uPrimrose.
AbakoPrimrose bahamba bayathatha umntwana kaPrimrose ngoba uNcube wayesafuna ukuthi athole amaphepha emthethwandaba ukuthi abenguye umzali kaSally, njengoba wayethembise uPrimrose ukuthi uzasala enakekela uSally.
Kwadlula iminyaka emibili abakoPrimrose sebebona uNcube engasavakatshi engasalobi lencwadi bathi kungangcono bayemkhangela endlini yakhe bathola sekuhlala umnewabo uJoe owahle wabaphatha luklubhu wabaxotsha njengezinja.
Babuyela ngemva kwamaviki ambalwa sebesiyathatha izinto zikaPrimrose bekhulumisana labakoNcube ukuthi babancedise ukuthi bathathe incwadi yokufa kukaPrimrose okuzakwenza ukuthi umntanakhe uSally enelise ukuqhubekela phambili ngemfundo yakhe.
UJoe waqala esala ukuthi abancedise esithi uyesaba ukuzondwa yimuli yangakibo ngoba wayebona ingani i-death certificate kaPrimrose ingaphuma uSally uzahamba emthethwandaba eyezama ukulwela ilifa lakhe ayelitshiyelwe nguNcube.
UJoe ayekhala ngakho yikuthi incwadi yokufa kukaNcube yayilotshwe ukuthi uNcube wayengatshadanga, njalo yena wayengasazwisisi ukuthi abakoPrimrose babesithi uPromise wayetshade lobani.
UPromise uthi wayangeka esesizwa uJoe esesithi uyise nguye owathi uNcube loPrimrose babetshadile, bona babekwazi behlalisene, ngoba phela lamzwana esiyavela wahamba lomakhelwane wakhe olikhiwa kazange abize abangakibo.
Esikuthabelayo yikuthi uPromise ubekezele ngoba emthanda umtakadadewabo, balutshwana abanjengaye, abathanda abantwana babafowabo ngaloluhlobo.
USally laye owayesekhala ngokuthi lwamenza uthando lukanina lobabawakhe, ujabule kakhulu ngoba sesenelisa ukuthi athole imali zikanina eze-pension ukwenzela ukuthi aqhubekele phambili ngemfundo yakho.
Asihlanganeni ngeviki elizayo
Umlobi utholakala kukheli ethi , [email protected], www.trinityproject.biz loba kunombolo zocingo ezithi 0773195055.
