uMthunywa
Ncekwenhle Ncube
SEZIDLELA egilweni izakhamizi zesiqintini seKopa eNyathi nanko phela izakhamizi ezidlula isithupha sezivale izibaya zazo zembuzi ngenxa yabomakorokoza abazitshontshayo asebegcwele endaweni le.
Loluhlupho luqale ngomnyaka odluleyo ngesikhathi abadingisisa ngamatshe aligugu bethole ukuthi emadlelweni ezifuyo zakulesi isigaba kulegolide.
Kubikwa otsheketsha baqala ukutheleka kule indawo njalo abanengi bahlala emikhukhwini abayakhe duze lemigodi yabo.
Ekhuluma lentatheli kaMthunywa uMnumzana Khayelihle Dube uchaze ukuthi izifuyo zabo ziqale ukuphela ngesikhathi kuqala ukwenjiwa igolide emadlelweni abo kanti njalo sebekhuphe ingoda ezinengi okukhanya sobala ukuthi ngezokuthiya imbuzi zabo.
“Lokhe kwaqala ukugejwa igolide emadlelweni ezifuyo zethu kwahle kwaqala ukucatsha imbuzi zethu.
“Sike sabhoda emangweni lapha sikhangela ukuthi mhlawumbe singabona lapho ezidlelwa khona kodwa akukhanyi ngitsho.
“Sikhuphe ingoda ezinengi kakhulu engagwini engilethemba lokuthi yizo ezibamba imbuzi zethu kanti njalo sicabangela otsheketsha laba abemba kulo umango,” kuchaza uMnu Dube.
Esinye isakhumuzi esingathandanga ukuqanjwa ngegama sichaze ukuthi sesadlelwa imbuzi ezifika itshumi.
“Imbuzi zami ziyedlula itshumi zidliwa kodwa angazi ukuthi zidliwa yini.
“Okwakhathesi ngidlulise ilizwi esigabeni ukuthi nxa ekhona ongigangelayo lami sengizathuza,” kufunga isakhamuzi lesi.
Emhlanganweni obukhona ngeviki ephelileyo kubikwa izakhamizi zisole kakhulu ikhansili ngokuvumela ukuthi abantu abangaziwayo babuye bezokwemba amatshe aligugu emadlelweni abo izakhamizi zingabikelwanga.
Zibuye zakhonona ngokuthi lababantu ababazi yikho nje noma bengona esigabeni akulamuntu ongatsho ukuthi ngobani.
Lokhu kwenza lamapholisa esigaba abe lobunzima ekwenzini umsebenzi wabo.
Ebuzwa ngale indaba usobhuku wakulesi isigaba uMnumzana Godfrey Siwela uthe kuyenzakala njalo bazabona icebo njengenkokheli ukuqeda ubugilimbane lobu.
“Ukukhala kwezakhamizi kuzwakele kithi njengenkokheli. Sizenza umhlangano labanini bemigodi sikhuze uzulu wonke ngesenzo lesi esibi sokutshontsha.
“Kulamanye amasela esigabeni asezafuna ukucatsha ngokuthi ngotsheketsha abatshontsha imbuzi zabantu labo sizabakhuza njalo sizacela amapholisa ukuthi asincedise ukulwisa loluhlupho,” kuphetha uSobhuku uSiwela.
