Yizililo zodwa ngoRalph Matema

22 Sep, 2016 - 13:09 0 Views
Yizililo zodwa ngoRalph Matema

uMthunywa

Ncekwenhle Ncube
ABANYE bebethi uRalph Matema umdlali weHighlanders sekusele udokoza nje kuphela. Abasiki bebunda besithi likhebece, into engelancedo. Kodwa kubalandeli bezikaMagebhula umdlali lo uze loluju ngoba sebengcinda iminwe ngaye.

UMatema useligaxe entanjeni imidlalo ilandelana njalo amabhola la awahlohlayo ayamangalisa, okudala ukuthi abasekeli babike ukuthi usebekhumbuza ngesikhathi besambiza ngelithi ‘Banolila’.

Wathola ibizo leli ngemva kokuthi ehlohle amabhola amathathu kumdlalo wakhe wakuqala efika kuHighlanders. Ngalesikhathi uMatem wafika wareyitsha phezulu kodumo lwengoma kaSkuza u‘Banolila’.

Kumidlalo edluleyo, umdlali lo wengeze isisindo sebizo lakhe lokusoma leli, watshiya amanye amathimu ekhala okweqiniso ngokuhlohla kwakhe amabhola anqobise iHighlanders.

Enkambeni yabadlali beBosso kulisizini, uMatema nguye yedwa umdlali omkhulu  othi nxa engena enkundleni kukhale amavuvuzela, ukhwelo lemvokloklo, lombululu uzwakale kwabesifazane uvale indlebe.

Usebonise abalandeli bakhe ukuthi ulokhe esasekhona njalo sebukhali ukwedlula kuqala.

UBanolila usedlale imidlalo emithathu ilandelana njalo etshiya imvimbi zihlahle amehlo njengoba ukukhethuza kukhanya kuyinto esegazini kanti njalo lokudabula umambule kakuthandabuzi.

Emdlalweni obekhona phakathi kweqembu lezwe lonke ‘lamagumaguma’ eBorder Strikers,  uMatema utshengise ukuthi usasekhona emdlalweni kulandela ukuthi angene ngehlandla lesibili njalo nguye owatshayela ibhola lokucina elenza iBosso ithole imiklomela emithathu.

Njengenhlalayenza uBanolila wenze khonokho okutshiwo libizo lakhe mhla zibophene ngomsila ezikaMagebhula leDembale enkundleni yeBarbourfields. Wangena ngehlandla lesibili kwaduma iSowethu kwakhala ivuvuzela umsindo wathi bhe enkundleni kwabamnyama ebusweni bezivakatshi.

Akathathanga lemizuzu emingaki watsho esengenile ngenhloko unozinti walaxazeka kwabamnandi Empankweni leSoweto kwathi eMpilo ngapha kwabayizililo kuphela.

Intatheli ixhumane lamaqula abalandeli beTshilamoya ababike ukuthi bebengacabangeli ukuthi uMatema engayiphinda into yakhe yakudala.

“Usekwenza ayesitshengisa khona ngeminyaka efika kuBosso. Sikhumbula esahlohla nsukuzonke. Ukudlala kwakhe kuyehlisa inyembezi zenjabulo,” kubika Nozithelo Nxumalo olilunga leSouth African Highlanders Supporters Chapter.

Omunye umlandeli weBosso othande ukwaziwa ngokuthi nguMadlela uthe ukuza kukaMatema bebengakuboni ukuthi kuzaba lusizo kodwa kuthe ngemidlalo embalwa aseke wayidlala sekubacacele ukuthi kakapheli.

“Eqinisweni yikuthi ngesikhathi uMatema efika eqenjini besicabanga ukuthi oGumede badlalisa imali bethatha inkabi ezindla amajongosi egcwele kodwa khathesi sekucaca kithi ukuthi uBanolila ulokhe esasekhona okuchaza ukuthi inyembezi zizachinca.” kutsho uMadlela.

UMuziwandile Nkomo oseSouth Africa uxhumane loMthunywa ebulenjini wachaza ukuthi bona bebelokhe belethemba lokuthi uBanolila usasekhona noma nje eke walimala ngesikhathi edlalela iOrlando Pirates eGoli.

“UBanolila besilokhe silethemba lokuthi angadlala ibhola elingcono kakhulu njalo ukuza kwakhe kuBosso sikubone kungumzamo omuhle owenziwe zinkokheli zeqembu lethu njengoba besilokhe sithwele nzima lokhe kwahamba uKnox Mutizwa loBruce Kangwa.”

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds