Mbalisi, Balis’ungabalisi

16 Sep, 2016 - 15:09 0 Views

uMthunywa

Charles Dube

Singakayi kude sokuhle kwavela okutshiwo yisihloko salo umdlalo. Isihloko lesi sitsho ukuthi umbalisi kafundise, kafundise abafundi ukubala. Hatshi ukuthi abekhuluma indaba ezinenginengi engenzi umsebenzi wakhe wokufundisa abantwana. Silezibonelo zabantu abasebenza ukubalisa abakhuluma ngalokhu lalokhu okunjengokungasuthiseki ngeholo lababalisi kodwa bengasebenzi okuqinileyo.

Sithola-ke umbalisi ekhuthazwa ukuthi kabalise, okuyikuthi kafundise abantwana hatshi ukuqeda isikhathi ekhuluma engasebenzi, efundisa abafundi okwesikhathi esifitshane kuphela. Umabhala ulwethula kahle udaba lwababalisi.

Uyasivezela ukuthi kunengi okwenzakalayo phakathi kwababalisi beqhuba umsebenzi wabo. Kukhona abenza umsebenzi wabo ngokuzimisela njalo kubekhona olova abaphethe emlonyeni kuphela. Ukubeka sobala umabhala ukuthi ukukhangele okwenzakalayo njalo konke sikubona ngelihlo lakhe.

Umdlalo wethu lo uqala umabhala elabanye ababalisi. Bahlezi ababalisi laba bathwebula izingwalo (amabhuku) abantwana njalo baphethe lapha emlonyeni umqondisi womdlalo aze athi, iyatsha ingxoxo. Umabhala yena santathelizindaba uhlezi ekhoneni lakhe, ubukele, ulalele, uyabhala. Kuhle ukuthi basebenze betekulisana ukuze ungabasindi umsebenzi njalo bengawuzondi. Siyezwa ekuqaleni lapha umbalisi okuthiwa nguMpumelelo exoxa lomunye okuthiwa nguSipatalala.

Uxolo lapha angikahlolisisi ukuthi ngibone ukuthi amabizo abalingiswa laba alokuhambelana lezenzo zabo yini kulumdlalo. Into esiyibonayo lapha yikuthi uMpumelelo utshela uSipatalala ukuthi kulo umnyaka uzayizwa impumela yabantwabakhe. Utshengisa ukuthi uzasebenza nzima uMpumelelo ukuze abantwana abafundisayo baphumelele kumihloliso yabo. Usongela uSipatalala ukuthi uzamedlula ngokudlala ngamabala ethi uzamedlula aze ethuke.

Kungathi uMpumelelo uthuka omunye abasebenza bonke uSipatalala ngoba phezu kokumedlula aze ethuke kuthiwa uzabhalela logogo wakhe incwadi ngebhonga. Lihaba leli elisebenze lapha ngoba akulancwadi eyake yabhalwa ngebhonga. Uyaqhubeka ethi uSipatalala uzamedlula ahle acine ukuyanatha amanzi la enza alove emsebenzini.

Lapha ukhuluma ngokuhlonipha kafunanga ukuthi ahle athi bhadla ethi uSipatala uzacina engasayinatha utshwala obuyibo obumenza alove emsebenzini.

Ngamafitshane sesihle sibona ukuthi umbalisi lo okuthiwa nguMpumelelo uyisibhanxa enkulumeni. Sesihle sikuqedisisa njalo ukuthi uSipatalala lo ngumbalisi oyindlamanzi, odakwayo phela ngoba uMpumelelo uthi utshwala bumenza alove emsebenzini. USipatalala ukutshaya indiva lokho okukhulunywa nguMpumelelo laye abisele amazwi ahlabayo ethi oMpumelelo bayahlupha ngoba bengathola izicoco zokuba ngababalisi bomnyaka basuke bacabange ukuthi abanye abawenzi umsebenzi.

Ugwaba ngalokho akwenzayo uSipatalala ethi babunatha zonke insuku utshwala kodwa abantwana bephumelela (bepasa) yonke iminyaka. Liqiniso na leli? Angazi kumbe ababalisi abanathayo utshwala bavumelana lakho lokhu ukuthi banathe besemsebenzini, kodwa mina ngokwazi kwami ababalisi abavunyelwa ukunatha utshwala besemsebenzini. Yikho esikubona njalo sikuzwa ngomabhala lapha. USipatalala uzibula ngokunatha kwakhe utshwala.

Uthi, “Singama-daily drinking officers aphansi kweZADU, Zimbabwe African Drinkers’ Union”, kodwa umsebenzi bayawutshaya. Ngumuntu onjani uSipatalala? Kayisikho na bembiza ngelikaSipatala? Funda kunsuku ezizayo lapha sizama ukuwuxakulula lumdlalo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds