Sebenzisani umquba wamanzi

16 Sep, 2016 - 09:09 0 Views
Sebenzisani umquba wamanzi

uMthunywa

Johas Moyo
ABALIMI kuleli sebekhuthazwe ukuthi basebenzise indlela entsha yokuvundisa insimu zabo ebizwa ngokuthi yi-liquid manure ngoba izilimo zakhona zisenza kuhle kakhulu.

Umquba wamanzi lo kubikwa kawubulali inhlabathi njalo wenziwa ngokufaka umquba phakathi kwamanzi okwamaviki amabili andubana uthelwe ensimini kusetshenziswa i-drip system.

UMnumzana Mthobi Ndiweni ongumlimisi esabelweni seMatabeleland South ubikele uMthunywa ukuthi   abalimi nxa bengaqalisa ukusebenzisa indlela le entsha yokulima besebenzisa umquba wamanzi balakho ukuba lesivuno esihle.

“Kuqakathekile ukuthi abalimi bangasaleli emuva kodwa balandele indlela ezintsha zokulima ezingenayo.

“Indlela lezi zithuthukiswa ngoba kulenjongo yokuthi abalimi bathuthukise isivuno sabo.

“Lokhu kulakho ukubaphathisa ukuthi bathole ulwazi ngezokulima njalo bathuthukise izilimo lenzuzo yabo,” kulandisa uMnu Ndiweni.

Uthe bakhuthaza abalimi ukuthi baqoqane bayefundiswa ngokusebenza komquba wamanzi lo.

Uqhubekele phambili elandisa ngokwenziwa komquba wamanzi lo lokuthi usetshenziswa endaweni ezinjani.

“Nxa umuntu efisa ukwenza umquba wamanzi lo kumele athele umquba wakhe phakathi kwetanka ahlanganise lamanzi balinde kuhlale okwamaviki amabili andubana baqalise ukuthelela ngawo njalo  lawomanzi ayabe sengumquba.

“Lumhlobo wokuthelela wenza kuhle kulabo abalima ezivandeni bethelela nge-drip system yona emunya amanzi endaweni eyodwa isiya kwezinye.

“Lokhu kungeyinye indlela engaqedi amanzi ngoba amanzi afika angene lapho umlimi ayabe ethelela khona ikanti njalo umquba ndawonye lamanzi kuyabe kungena sikhathi sinye kuleso silimo,” kutsho uMnu Ndiweni.

Uphethe ngokukhuthaza abalimi ukuthi badinge usizo kubalimisi abaseduze labo nxa kukhona abangakuzwisisiyo njalo bahlale bevikele izilimo zabo kuzibungwana lobudli obungaba khona.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds