uMthunywa
Ncekwenhle Ncube
UMPHATHINTAMBO wogatsha lwemfundo yaphezulu uSikhwicamfundo uJonathan Moyo useveze ukuthi ugatsha lwakhe lulungiselela ukwengeza inani lamakolitshi emfundo yaphezulu ngoba sebebanengi abafundi okumele babe semakolitshini kusukela kuwonale umnyaka kusiya phambili.
Ekhuluma ensukwini ezisanda kwedlula koBulawayo uSikhwicamfundo uMoyo uchaze ukuthi ilizwe leZimbabwe lizimisele ukwengeza inani lamakolitshi akhona ukuze abelitshumi.
Uthe lokhu kuzancedisa ukwehlisa inani labafundi kwamanye amakolitshi njengoba kulezinsuku sebebanengi abafundi abaqeda izifundo zabo zesekhondari.
Kuvele ukuthi kusehlelweni logatsha lwezemfundo yaphezulu ukuthuthukisa izifundo zamakolitshi onke nje jikelele elizweni.
Uthembise abafundi ukuthi phezulu kwezifundo lezi abaziphiwayo abafundi sebezafunda bazuze ama-degree.
Lokhu kuzenza ukuthi abafundi abasuka emakolitshini bangathwali nzima ukuthi baqale phansi emayunivesithi ukuyadinga ama-degree.
Abafundi bamakolitshi banikwe ithemba lokuthi phezulu kwama-diploma sebezafunda baphiwe ama-Bachelor of Technology alesisindo esifana xathu le-degree.
Ngaphandle kwalokhu uSikhwicamfundo Moyo ubuye wapha abafundi umlandu omkhulu wokuveza amathuba omsebenzi ngokuziqalisela awabo amankampani.
Uthe kuqakathekile ukuthi abafundi basebenzise ulwazi abalalo ukuze bathuthukise ezomnotho elizweni lakithi.
Omunye wabafundi obegcotshwa uNkosazana Thembelihle Ncube uchazele intatheli ukuthi lolu luhlelo oluhle kakhulu njalo olufike ngesikhathi esifaneleyo oluzasiza abafundi abanengi.
“Sithemba ukwengezwa kwamakolitshi ePolytechnic kuzaveza imisebenzi kubabalisi njalo kuzenza abafundi bazuze imfundo elohlonzi.
“Okunye njalo kuzenza abafundi abaqeqetshe emaPolytechnic benelise ukumelana labanye abafundi abasuka emayunivesithi nxa sebedinga imisebenzi,” kutsho uNkszn Ncube.
Iphephandaba likazulu lizwe ukuthi amakolitshi azangezelelwa izifundo ukuze abafundi benelise ukuzuza amaHigher National Diploma azenza kungadingeki ukuthi abafundi abasuka ePolytechnic baqale phansi nxa besiya emayunivesithi.
