uMthunywa
Ncekwenhle Ncube
ZILOKHE zithithibele izakhamizi zeNsuza ngemva kokuba esinye isakhamuzi esingumkhunkuli sitholakale silodiwo olugcwele igazi labantu abafayo emini libalele.
Izakhamizi zeNsuza ezisuka kuVillage 3B zilokhe zingakukholwa ezakubonayo ngesikhathi esinye isakhamuzi esaziwa ngokuthi nguNakaManginga sibanjwa xhaka lodiwo olucatshangelwa ukuthi lugcina igazi labantu abafileyo.
Intatheli kaMthunywa izwe ukuthi izakhamizi zeNsuza zahlala phansi zaphuma lecebo lokuthi kuhlahlulwe nanko phela ubuthakathi besekuyinsakavukela umchilo wesidwaba.
Ngenhlanhla enkulu bazuza omunye umphurofithi okuthiwa nguMaravaza okhanya ebaba. Nguye lowo osevumbulule ubukhunkuli esigabeni lapha.
Iphephandaba lixhumane loMnumzana Mkhuleko Ndlovu owayekhona ngesikhathi kukhitshwa udiwo lolu olwalulegazi. Yena uchaze ukuthi yinto eyenzakalayo njalo kwabethusa.
“Sezwa uMaravaza esithi ‘hamba uyethatha’ wagiqika phansi uNakaManginga esithi kalalutho. Wamfafaza ngamanzi omthandazo weqa wagijima waya emzini wakhe waphenduka ethwele udiwo olungumdaka njalo lucazimula.
Kwathiwa kaluvule kodwa wala esithi uyesaba,” kutsho uMnu Ndlovu echasisa.
Omunye umfakazi oqotho ongathandanga ukuqanjwa ngegama uthe lokhu kwenzakala emini kanti njalo abantu bonke bakubona.
“Kwakhitshwa udiwo oluhle olucazimulayo salubona sonke esasikhona. UNakaManginga wala ukuluvula lwaze lwavulwa nguMaravaza.
“Samuzwa esithi yena uyahlanya ngakho umphurofethi katshiyane laye,” kuchaza umfakazi lo.
UMthunywa uzwe ukuthi umphurofethi wathi kwasekulenyanga ezintathu ugogo lo engayi ngaphandle ngoba wanyathela kubi udiwo lwamvala.
Kubikwa ukuba umphurofethi wonela ukuluvula udiwo lolo uNakaManginga wahle waqala ukwenza njengomuntu ongaphilanga kuhle engqondweni njalo waphathwa yisihudo.
Kubikwa wayesekhuluma yedwa njalo lezinto ayezikhuluma zingazwakali. Ababeseduze bathi wayelokhu esithi yena uyahlanya ngoba sewanatha igazi labantu abanengi.
Ngenhlanhla yamaSwazi intatheli yenelisile ukuxoxisana lomphurofethi uMaravaza ovumileyo ukuthi indaba enjalo yenzakala.
Ubuye wathi yena uthunywe nguMdali wamazulu ukuthi azosiza abantu bakhe abasesonweni.
“Inkosi yiyo engiphathisayo nxa ngisenza umsebenzi lowu. Kanti njalo akusiyo injongo yethu ukuthi laba abantu babe yinhlekisa esigabeni.”
“Udiwo lolu salukhupha lugcwele igazi labantu abafayo. Sahle salutshisa ukuze kungaphindi kube yinto ehluphayo esigabeni,” kuchaza uMnu Maravaza.
UMthunywa uzwe njalo ukuthi lokhu kwakhitshwa udiwo lwegazi lolo uNakaManginga kasaphilanga kuhle engqondweni njalo uzwakala ekhuluma yedwa.
