uMthunywa
Leonard Ncube
ZISELE zibambe owangaphansi izakhamizi zeSizinda eVictoria Falls ngemva kokuba omunye usobhuku walesisigaba etshaywe waze wazitshiya ngemva kokubanjwa xhaka ezitika ngomfazi wesakhamuzi.
Lesisiga senzakale mhlaka 8 kuyonale inyanga njalo bekulesililo endaweni yeSizinda, lapho uSobhuku uFelix Dube anyenya waya emzini kaMnumzana Everson Tshuma wayancinda uluju lwemvelo lomkakhe etshiya ezinye izakhamizi emfeni.
UDube ngalobobusuku akabuzanga elangeni nanko phela uMnu Tshuma, yena osebenza eFolosi wayesendleleni esiza ekhaya.
UMnu Tshuma wafica imihlolo emzini wakhe ngehola lesitshiyangalombili ntambama lapho ethola umkakhe, uMaNdlovu (26) loDube (65), bebhunyumunyu endlini yokulala.
Konke lokhu kubikwa kwenzakale emehlweni osane lukaMnu Tshuma.
Kubikwa uMnu Tshuma ubophe uDube izandla lenyawo andubana ambhaxabule waze wazitshiya njalo ebongolela okwenza ezinye izakhamizi zigijime zizobona.
UMnu Tshuma usuke wayabika udaba lwakhe kumlisa uEnock Marathuza esethesa uDube icala lokufohlela emzini wakhe.
Iphephandaba likazulu libe lethuba lokuyalalela icala leli enkudleni kamlisa uMarathuza ngeSonto.
UDube ulilandulile lelicala kodwa inkundla kamlisa, obencediswa ngabanye abalisa abagoqela uGoodman Mpofu njalo engowesigaba seSizinda loGama Siwela oweLupinyu, imfumane elomlandu yamhlawulisa ithokazi kumbe amakhulu amahlanu amadola.
Umlisa uMarathuza ubuye njalo wathathela uDube ibhuku lobusobhuku ngoba phela eyangise uzulu wonke ngokwenza okungakhangelelwanga kumphathi wesigaba.
“Lelicala angilivumi. Yebo ngiyavuma ukuthi ngatholakala emzini kaTshuma kodwa kungamanga ukuthi wangithola endlini yakhe nginqunu. Yena nguye owangikhulula impahla engitshaya njalo angithandani lomkakhe.
“Ukuze ngitholakale emzini wakhe ngangizihambela nje ngisiyakhulumisana lomkakhe ngempahla ezazithengiswa ngumngane wakhe,” kutsho uDube elandula icala.
Esethula isigwebo sakhe, umlisa uMarathuza uthe: “Lelicala liyisifundo kubaphathi bezigaba ngoba sikhangelelwe ukuba ngumzekeliso wobuhle ebantwini. Ngoba ungene emzini womnikazi watshengisa abantwana ubunqunu bakho, inkundla ikuhlawulisa ithokazi elilodwa kumbe i$500.
“Ngalesisikhathi sengikuthathela ibhuku lakho eselizabanjwa ngumabhalani wakho uNkosikazi Sophia Ncube kuze kufike isikhathi lapho induna ezangipha amandla okukhetha omunye usobhuku,” kutsho umlisa uMarathuza.
Omama abahlanu bafakaze phambi kwenkudla ukuthi kuliqiniso ukuthi uDube watholakala enqunu nanko labo bamthola ebongolela esesangweni lomuzi kaTshuma lapho umninimuzi owayesembophele khona ngemva kokuzitshiya.
Inkundla imsole kakhulu uDube, yena osewathatha impentsheni eHwange Colliery, ngokungatshengisi ukuzisola ngesikhathi emiswe phambi kwayo.
Kuzwakale njalo ukuthi uDube kaqalisi ukuthandana lomfazi womuntu.
UMnu Tshuma uhlengezele inyembezi ngesikhathi elandisa udaba lwakhe phambi kwenkudla.
“Ngathi ngifika emzini wami umkami kwamthatha isikhathi ukuthi avule umnyango ngahle ngasola ukuthi kukhona okunuka santungwana.
“Kuthe nxa evula umnyango ngamthola enqunu njalo uDube wayesecatshe ngemva kwesivalo laye enqunu.
“Ngambuza uDube ukuthi udingani endlini yami yokulala ebusuku njalo enqunu, wathi ‘ngiyaxolisa’. “Yiso isikhathi engathatha impahla zakhe ngiziphosa phezu kwekhabothi,” kulandisa uMnu Tshuma.
Utshele inkundla ukuthi uDube uke wazama ukumlwisa kodwa kwamehlula. Yikho futhi okwangenza ngambopha izandla lenyawo waze wazitshiya lokuzichamela. Ngangifuna ukumhudula ngiye laye emfeni okwakulezakhamizi zonke kodwa wazenza osefile yikho ngaze ngambophela esangweni,” kulandisa uMnu Tshuma.
UmkaTshuma yena wahle wadliwa ngumswenya akwaziwa ukuthi waya ngaphi.
