uMthunywa
Cornelius Luphahla
IZAKHAMIZI zesigabeni seDlawa eNkayi lokhe zivusana ngendaba yelinye inina elibanjwe xhaka ngumkalo lincinda uluju lwemvelo lomkamakhelwane.
Indaba le yenzakale ngoLwesihlanu kuviki ephelileyo lapho uSiphosami Ncube akhandwe khona ngumkakhe uMnumzana Lameck Hlabangani esemacansini lomakhelwane wakhe uLangelihle Ndebele emini libalele emzini wakhe.
Kuzwakale ukuthi uNdebele wasuka emzini wakhe esithi uyathenga amatamatisi lemibhida komakhelwane yena esazi ukuthi uyabonana lomakhwapheni wakhe uNcube.
UMthunywa ukhulumisane loNkosazana Mercy Moyo oyisakhamuzi sakule indawo waveza ukuthi yena wezwa umkhosi komakhelwane wasesiyabona ukuthi kuhamba njani.
“Mina ngabizwa ngumkhosi komakhelwane ngathola uHlabangani ebhaxabula uNdebele ngogodo ngazama ukulamula ngehluleka ngaze ngancediswa ngabanye omakhelwane.
“Ngemva kwalokho ngabuza ukuthi babangani umakhelwane wathi uMaNcube utholwe ngumkakhe elele loNdebele yikho okudale ukuthi abatshaye,” kutsho uNkszn Moyo.
Ebuzwa ngale indaba uNkszn Ncube uchaze ukuthi kakwazi ukuthi wayengenwe yini aze enze ihlazo elinje.
“Angikwazi ukuthi ngangingenwe yini ngize ngenze ihlazo leli. Okunengi ngeke ngikulandise ngoba kungizwisa ubuhlungu kakhulu nxa ngikucabanga.
“Ngesifiso sami ngabe kawungibuzi ngendaba le ngoba uzangichithela umuzi wami, khona sesakhuluma lomkami sayilungisa,” kuveza uNkszn Ncube.
UMnu Ndebele ubikele intatheli ukuthi indaba le yenzakala kodwa bakhulumisana lomakhelwane wakhe wahlawuliswa ngempuphu.
“Kuliqiniso sibili ukuthi ngawona komakhelwane wami kodwa sakhulumisana ngamhlawula i50kg yempuphu ngakho kangikwazi ukuthi ngubani osebikele abamaphephandaba.
“Okunye ngeke ngikukhulume ngoba umakhelwane wami uzabona angathi kangizisoli ngesenzo sami,” kutsho uMnu Ndebele.
Usobhuku wakule indawo uMnumzana Sabelo Mathema uchaze ukuthi indaba le uyayazi njalo sebeyilungisile.
“Indaba yokubanjwa kukaNdebele lomkaHlabangani ngiyayazi kodwa siyikhulumile uNdebele samhlawulisa i50kg yempuphu,” kuphetha uMnu Mathema.
