uMthunywa
Cornelius Luphahla
ZIMADOLONZIMA izakhamizi zesigabeni seGreen Gray eMzingwane ngemva kokuba usobhuku wakule indawo ekhitshelwe umgobho obuhlala esiphaleni sakhe okucatshangelwa ukuthi ubuvala izulu njalo usembulalele abantwana abane, uMthunywa ukuzwile lokhu.
Isehlakalo lesi esitshaqisa umzimba senzakale ngoLwesihlanu kuviki ephelileyo lapho uMnumzana Gideon Ncube akhitshelwe khona inhlathu esiphaleni sakhe ngabaphurofethi okubikwa ibisimqedele imuli njalo iphila ngamabele.
Kuzwakale ukuthi inyoka le yayihlala esiphaleni salesisakhamuzi njalo iphila ngokutshontsha amabele isidla.
UMthunywa ukhulumisane loNkosazana Ruth Mkhwananzi wathi kazake ayibone inyoka engangale ayibona koNcube njalo lokhu ethithibele.
“Kangilankani ngenyoka engayibona ikhitshwa ngabaphurofethi koNcube ngoba lokhe ngazalwayo kangikaze ngiyibone. Into eyangethusa kakhulu yikuthi uNcube wazivumela ukuthi inyoka le ngeyakhe njalo ibizwa ngokuthi nguMathanzima. Wahamba yedwa esiyayithatha yamehlula waze wabiza abaphurofethi,” kutsho uNkszn Mkhwananzi.
Ekhuluma lentatheli uMnumzana Anderson Bhaca uveze ukuthi abaphurofethi bayikhipha nzima inyoka le umnikazi sesithi simhluphile babuya bathi yiyo esimqedele abantwana.
“Kwathi ngesikhathi sokuhambe izithunywa zafika zayikhipha inyoka le esiphaleni noma nje zathatha isikhathi eside ukuze ziyikhiphe. Ekukhitshweni kwenyoka le uNcube wayesekhala ethi bengayiyekela izasala imbulala ngoba simhluphile.
“Bathi sebeyibambile bamtshela ukuthi yiyo eyambulalela abantwabakhe abangu-4 ngakho kade sikhangelele ukubulala labo abaseleyo,” kulandisa uMnu Bhaca.
UMnumzana Sinini Magutshwa uveze ukuthi yena uyakholwa ukuthi inyoka le yiyo ebibathathela amabele ngoba bebengavuni lutho kodwa uNcube evuna.
“Mina ngiyakholwa sibili ukuthi inyoka le yiyo ebisiqedela amabele ivale lezulu ngoba thina kasivuni lutho minyaka yonke kodwa uNcube ensimini yakhe kuyabe kuluhlaza tshoko njalo uhle azikhulumele ukuthi yena amabele uzawatshaya noma kunjani.
“Thina abanye kasisalimi ngoba sisazi ukuthi kasisoze sithole sivuno ngenxa yokuthi izulu kalini kithi. Noma nje singakaze silibone lisina ensimini yakhe kodwa kusobala ukuthi inyoka yakhe iyawadonsa sibili amayezi ngoba ngeke ahlale etshaya inala thina singatholi lutho,” kuveza uMnu Magutshwa.
Ebuzwa ngale indaba uSobhuku uNcube uthe kuliqiniso ukuthi inyoka yakhitshwa emzini wakhe kodwa ngabe uyayazi ubezathi bamlamulele abaphurofethi bathi inyoka le idala inhlupho emzini wakhe.
“Akuphumputheki sibili ukuthi kuphume inyoka emzini wami ebisesiphaleni abaphurofethi bathi ibingiqedela abantwabami idale inhlupho emzini wami. Ngabe ngiyayazi bengizathi bangilamulele kodwa ngeke ngitsho njalo,” kuphetha uMnu Ncube.
