uMthunywa
Johas Moyo
ALOKHU ethithibele amalunga ebandla leSabatha esiqintini seSomkhaya eZhombe kulandela ukuthunjwa kwelinye ilunga lebandla leli ngesikhathi bebuthene emadokodweni, labotshelwa ephahleni lwendlu andubana libhaxabulwe, uMthunywa ukuzwile lokhu.
Kubikwa ilunga leli, uWisdom Nyoni lithunjwe ngoMvulo ngeviki ephelileyo.
Kuzwakale ukuba uNyoni wathunjwa ngomakhelwane bakhe abasuka laye ezihonqweni bangena laye iganga andubana bambhaxabule bethi uxhwalisa abantwana bangakibo.
Iphephandaba likazulu lizwe ukuthi ometheswacala laba bahloma bebanengi bayacathamela uNyoni bahamba bembophile besiya laye ngakibo.
Ekhuluma ngaloludaba uMnumzana Simbece Gatsheni uveze ukuthi yena wayekhona kuthunjwa umzalwane esiya ezifundweni njalo yena wayecabanga ukuthi ngabantu abadlala laye kodwa wethuka sesizwa kuthiwa umabavuvabu kulandela ukuthunjwa lokho.
“Ngangiseceleni kwakhe sisiya ezifundweni lapho okwathutsha khona amadoda amabili ehlomile amdonsela eceleni kwendlela. Kangizange ngizwe ukuthi babesithini ngoba babekhulumela phansi ngacabanga ukuthi bayazana.
“Lwangitshaya lwangeqa ngelanga elilandelayo ngisizwa kuthiwa ulimele utshaywe yilawa majaha bethi uxhwalisa odadewabo nanko phela basebemlandela lemhlanganweni bengaphiwanga imvumo ngekhaya,” kutsho uMnu Gatsheni.
UMthunywa uxhumane loMnumzana Mlungisi Ndumo yena obonise ukudabuka ngokwenzakalayo ngoba ethi ungumakhelwane kaNyoni njalo ngabantu besigaba sinye abenza isihluku esingaka.
“Bambophela ephahleni lwendlu bamlengisa bamkhulula ibhulugwe andubana bambhaxabule izibunu. Ngibabuza bathi bona uxhwalisa abantwana abangamantombazana bangakibo.
Into eyangidanisa kakhulu yisihluku abamenza sona umzalwane eziyela khonza. Kambe abantu sebengaze batshaye umuntu enqunu ebotshelwe ethungweni elengisiwe bemelula lembambo ngoba efela ukukhonjwa kulowomuzi, kangilankani ngesenzo sabafana laba,” kutsho uMnu Ndumo.
USobhuku wendawo uMnumzana Clifford Sifumbethe ubike ukuthi indaba uyizwe ngendumela kodwa enkundleni ibingakabikwa njalo kalaqiniso lokuthi lemapholiseni yabikwa.
“Ngiyizwe abantu bexoxa ngayo nje ukuthi kulento embi kangaka eyenzakalayo emfaneni wakoNyoni kodwa kabakabiki enkundleni njalo abazali balowo mfana abakho ekhaya, mhlawumbe kusalindwe bona ukuthi kukhulunywe ngayo,” kutsho uMnu Sifumbethe.
