uMthunywa
Kuyaqanda kulezinsuku njalo kuyadingakala ukuthi abantu badle izincindamlomo (pudding) ezitshisayo ukuze bakhudumale, futhi bavikele imikhuhlane engabahlasela yikho nje singawo amaphudingi ekuphekeni khona udle ukholise, uwuncinde umlomo isibisibili.
Zwana phela uzifundele njalo uziphekele, nanku lapha:
Okudingakalayo
-⅓ yenkomitsho yefulawa
-¾ yenkomitsho yetshukela elimhlophe
-Isigogo esivuthiweyo se-lemon elikhulu elilodwa.
-Umhluzi welemoni elilodwa.
-¼ yenkomitsho amanzi aqandayo.
-Amaqanda amabili.
-Inkezo zokudla ezintathu zemajarina loba ibhata
-Umganu wokuhlanganisela
-Umganu wokubhekela (pie dish)
-Ipane
-I-oveni etshisa okuyi 350 degrees
-Ukhezo lokuhlanganisaa kumbe uphini lwesigodo
Ukupheka
Ngaso sonke isikhathi, khumbula ukugeza izandla zakho uzesule ngelembu elihlanzekileyo andubana upheke ukudla. Ngamafitshane ngithi hlanzeka ungadlisi abantu ingcekeza yakho.
-Okokuqala thululela ifulawa yakho emganwini ogubhileyo.
-Faka itshukela phezu kwefulawa.
-Thela izigogo zelemoni eligirethiweyo (grated lemon rinds).
-Thela amanzi phezulu.
-Thela njalo uchago oluqandayo.
-Khathesi thatha amaqanda lenkomitsho kuthi kwenye ufake okumhlophe kweqanda.
-Tshaya umthubi weqanda uze uhlangane ube lubindibindi.
-Thela umthubi lo phezulu kwefulawa leya.
-Khathesi thatha imajarina kumbe ibhata uyincibikilise.
-Thela imajarina phezulu.
-Thela njalo umhluzi welemoni phezulu.
-Khathesi tshaya okumhlophe kweqanda kuze kungani kuyaqinaqina.
-Thela lokhu okumhlophe phezulu.
-Hlanganisa konke okusemganwini ogubhileyo ndawonye ngokunanzelela.
-Gcoba i-pie-dish ngamafutshana.
-Thela konke okuhlanganisileyo ku-pie-dish.
-Nanzelela ekutheleni kwakho ukuthi konke kuthe silikici njalo kwanele kuhle.
-Thatha ipane yokubhekela, elamanzi atshisayo
-Thatha i-pie-dish ilehlama yonke ifake phakathi kwepane elamanzi atshisayo.
-Bheka ku-oven etshisa okuyi 350 degrees
-Bheka ekwemizuzu engu 45 kusiya kuhola (1 hour)
-Nxa sekuvuthiwe kwephule ukubeke laphaya.Ukudliwa
Sika incezwana kusatshisa ezenela imuli yakho badle ngemuva kokudla kwemini kumbe ntambama. Ungadla iphudingi le ngokuthela phezulu kwalezi ncezwana i-custard etshisayo udle kutshisa kumbe kuqanda.
I-custard
Okudingakalayo
-Inkezo zokudla ezintathu (3) ze-custard.
-Inkomitsho ezimbili zochago.
-Ihafu yenkomitsho itshukela.
-Umphika ongatsheliyo wokuphekela.
-Ihafu yokhezo lwetiye amafutha (cooking oil).
Ukupheka
-Hlanganisa imphuphu ye-custard lochago oluyikota yenkomitsho.
-Bilisa olunye lonke uchago.
-Thela inhlama ye-custard phezu kochago olubilayo, thela njalo itshukela.
-Thela amafutha ugoqoze.
-Yekela kuxhwathe okwemizuzu emihlanu.
Dlana ndawonye leLemon Soufflé kusatshisa ngalesi isikhathi somqando.
