uMthunywa
Johas Moyo
ZIKHOMBA ngophakathi izakhamizi zeFincham esigabeni seBubi nanko phela imikhuhlane ebangelwa yikunatha amanzi alengcekeza isizakwehla kule indawo kulandela ukudonselwa amanzi kusetshenziswa impompi okubizwa ngokuthi yi-piped water scheme.
Kubikwa izakhamizi zakule indawo bezinatha amanzi alengcekeza ndawonye lezifuyo okweminyaka edlula elitshumi lanhlanu njalo bezihamba umango omude zisiyadinga lawomanzi.
Uhlelo lokuhlanjululwa kwamanzi kuWadi 23 eFincham kubikwa luphumelele ngemva kokusebenzelana ndawonye kwenhlanganiso ezigoqela iHelp-Age Zimbabwe, German Agro-Action, Unicef kanye leDepartment for International Development (DFID).
Omele uSikomitsho weBubi uMnumzana Tapiwa Enock Zivovoyi uveze ukuthi uhlelo lokugejwa kwemigodi yamanzi lwaqalisa endaweni ezibalisa eTsholotsho, Binga, Lupane, Mguza khathesi luzaphelela eBubi endaweni yeFincham lapho okulohlupho lwamanzi kakhulu.
“Kuzo zonke lezi indawo sokwagejwa izibholane ezingu-153 kuthi lapha eBubi sekwagejwa kwalungiswa ezingu-30,” kutsho uMnu Zivovoyi.
Ekhuluma loMthunywa uNkosikazi Pauline Ngwenya owayengukhansila kuleyondawo kuqaliswa uhlelo lokugejwa kwamanzi uthe bayabonga kakhulu ngohlelo lokutholisa izakhamizi amanzi ahlanzekileyo njalo lempucuko sizakubakhona.
“Besilohlupho olukhulu lokuchitheka kwemizi ngoba abantu bebesilela amanzi ngitsho lawokugeza obekusenza obaba bayedinga amadlecatsha.
“Siyabonga amanzi asekhona ngoba imizi sizaqina njalo abantu sebezathola amanzi ahlanzekileyo okunatha,” kutsho uNkkz Ngwenya.
UMnumzana Adonis Faifi Sithole omgumhleli wonhlelo ze-Help-Age Zimbabwe uveze ukuthi bakhethe ukuncedisa iFincham ngoba sebenanzelele ukuthi bathwele gadalala ngodubo lwamanzi.
“Njengoba sesifake amanzi ahlanzekileyo silikhuthaza ukuthi impilo zenu ziguquke lani.
“Sebenzisani amathuba eliwatholayo ukuze lenze amaphurojekithi angalipha inzuzo.
“Sicela ukuthi ligcine kuhle impompi zamanzi kasifuni kuzwa kuthiwa sezifile kumbe sezitshontshiwe.
Amanzi ngawethu sonke njalo kasiwasebenziseni ngonanzelelo,” kutsho uMnu Sithole.
Kubikwa abantu bakulesisigaba bebehamba umango ongaba ngamakhilomitha ayisithupha besiyadinga amanzi.
Uhlelo lokutholiswa kwezakhamizi emaphandleni amanzi ahlanzekileyo kubikwa luqalise ngomnyaka ka2013 njalo kukhangelwe ukuthi lugqitshwe ngoMfumfu.
