‘Akbay bopha ijambo’: . . . umsebenzi womlungu uyaphela

25 Aug, 2016 - 16:08 0 Views
‘Akbay bopha ijambo’: . . . umsebenzi womlungu uyaphela UErol ‘‘Mkabayi’’ Akbay

uMthunywa

YiNtatheli kaMthunywa
NGESIMO esikhangelane leqembu leHighlanders kulogu yeCastle Lager, umqeqetshi wayo uErol Akbay angaphangisa aphenduke kubo nxa engehluleka ukuthi alethe injabulo ngokutshaya amanye amathimu kumidlalo ezayo.

Inyanga kaNtulikazi lekaNcwabakazi ayizange ibenhle kuHighlanders nanko sekudlule imidlalo eyisithupha iHighlanders isehluleka ukunqoba. Lokhu bekungakhangelelwanga njengoba iqale kakuhle ithimu le isezandleni zika-Akbay.

UMthunywa uyakuveza namhla ukuthi udaba olusegudwini kuliviki ngolukaAkbay lomsebenzi wakhe kuqembu leHighlanders. Loba isivumelwano sakhe lethimu sinqonqosela ukuthi kumele aqede ekunombolo yesine kulogu yeCastle Lager, akufihlwa ukuthi iBosso iyawa kumncintiswano wenkezo.

Umbono okhona ezitaladeni kubalandeli beTshilamoya yikuthi uAkbay nguye osetshile umoya wabalandeli.

NgoMvulo langoLwesibili ibhodi lequla le-executive yeBosso bahlanganise amakhanda kudingwa ukuthi mthakathi bani osehlasele ithimu yabadala.

Ukudideka amakhanda okufikele inkokheli zeHighlanders lezi kuvela ekuthini akula obekhangelele ukuthi uAkbay anqotshwe kulesi isibanga somdlalo. Pho kusuke kwathini? Lo yiwo umbuzo obukhona ngokwehluleka ukuthola imiklomelo  kumidlalo eyisithupha ilandelana. UAkbay ubebonakala njengomqeqetshi ozenelisa ukuthi abambanise iTshilamoya, aphinde enelise lokuthi abumbe abadlali kakutsha.

Umqeqetshi lo utshayelwa ihlombe ngokuguqula umdlalo kaBruce Kangwa, nanko umdlali lo usethole ithuba lokutshibilikela iAzam FC, iqembu lezipantsha eTanzania. Umqeqetshi lo engabe esenkingeni kodwa uzathola ukuthandwa ngabalandeli ngenxa yokuthi lokhe wafika kulithimu, iBosso isifake abadlali bayo abasakhulayo abanengi emehlweni abantu. Abadlali laba babalisa uKing Nadolo, uPrince Dube, uAdrian Silla, uBrian Banda loProsper Mathuthu. IHighlanders ilabadlali abalitshumi lantathu abangaphansi kweminyaka yokuzalwa engu-24.

Umsekeli kamqeqetshi uCosmas Zulu usebike ukuba abalandeli bengadeli kodwa abaqhubeke besekela ngoba iBosso ilekusasa enhle.

“Silekusasa enhle kuBosso. Abalandeli bethu ababekwazi ukuthi thina njengabaqeqetshi sizakwenza konke okusemandleni ethu ukuthi siliphakamise iqembu,” nguZulu lo.

Okwamanje, uAkbay ungena umdlalo weviki lamatshumi amabili lanye kungela okubukekayo ngomsebenzi wakhe.

IBosso ikunombolo yesithathu kulogu yeCastle Lager. Imiklomelo yayo ingu-32 okungakaze kubonakale kumbali yalithimu kuminyaka emithathu edluleyo.

Umqeqetshi weBosso lo kuzamele ayengeze ngokuthabisa abalandeli. Iqembu kumele libuthe imiklomelo, okuyikhona okuzaletha ukuthula kuHighlanders.

Ubunzima obubhekane loAkbay kuliviki kuyaziwa ukuthi buvele ngaphi njalo laye ubesazi ukuthi liyeza lelilanga.

Njengabo bonke abaqeqetshi abakhuza uMantengwane, ngalesi isigaba uzaqathaniswa labaqeqetshi bakudala.

NgeSonto iHighlanders idibana leHow Mine Emagumeni eBarbourfields.

Kusenjalo, iHighlanders izadlala leHow Mine kungela umdlali wezimbamgodi osehluphile uKudakwashe Musharu.

Umdlali lo umiswe ukudlala ngenxa yokuthola amakhasi alithanga amanengi.

Imidlalo kulimpelaviki:

NgoMgqibelo: Caps United v Mutare City (National Sports Stadium), Chapungu v Border Strikers (Ascot), FC Platinum v Chicken Inn (Mandava), Tsholotsho v ZPC Kariba (Luveve).

NgeSonto: Highlanders v How Mine (Barbourfields), Hwange v Triangle (Colliery), Ngezi v Dynamos (Baobab).

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds