uMthunywa
Johas Moyo
ABALIMA izilimo ze-horticulture sebekhuthazwe ukuthi banakekele kuhle izilimo zabo ukuze zingabulawa yizibungu njengoba ukutshisa sekuqalisile.
Ekhuluma loMthunywa uNkosazana Treggie Mpofu onguHorticulture Specialist esabelweni seMatabeleland North uthe abalimi baqaphele imihogoyi ngoba yandise ukuhlupha khathesi ngesikhathi sokutshisa ezivandeni.
“Abalimi kabanakekele izilimo ezivandeni zabo ezigoqela amakhabitshi, imibhida, amatamatisi, ihanyanisi lakho konke abakuhlanyeleyo ukuthi kungadliwa yizibungu,” kutsho uNkszn Mpofu.
Uthe abalimi abanengi bayekela izilimo zabo zidliwa okwenza bacine bengafezanga injongo yabo yokwenza umsebenzi lo ngoba inengi liyekela imihogoyi ibhole inhliziyo zezilimo ikakhulu ikhabitshi icine ingasenzanga kuhle.
“Sikhankasa kanje ngoba sesibhodile indawo ezinengi sakubona ukuthi kuyenzakala lokho kungakho sicebisa abalimi ukuthi bangekeli izilimo ziqedwa yimihogoyi lezinye izibungu bekhangele,” kutsho uNkszn Mpofu.
Uqhubekele phambili ngokukhuthaza abalimi ukuthi balungise ezinye indawo ezivandeni zabo lapho abazahlanyela khona izilimo zebusika ngoba ethi kuyabancedisa kakhulu ukuthi izivande zabo zihlale zilezilimo zomhlobo wonke ikanti kufanele bahlanyele izilimo ezihambisana lomkhathi esiyabe sikuwo.
“Sinanzelela njalo ukuthi abalimi abanengi kabenelisi ukuhambisana lesikhathi okucina kusenza ukuthi ezinye izilimo zabo zingenzi kuhle.
Kuyimfanelo njalo ukuthi bavundise izivande zabo ukuze izilimo zenze kuhle, lokho bengakwenza ngokuthi bafake imivundiso ehambisana laleso silimo,” kutsho uNkszn Mpofu.
Uphethe ngokukhuthaza abalimi ukuthi bafafaze izilimo zabo ukuze izibungu zonke zife.
Uthe kwesinye isikhathi ubudli benyoni buyabe bubizwe yimihogoyi ngokunjalo abalimi bangathenga imithi ebulala imihogoyi kabasoze bahlutshwe lazinyoni.
Uphethe ngokucebisa abalimi ukuthi bangathandabuzi ukudinga usizo ngokusebenzisa imithi etshiyeneyo kubalimisi ukuze babelesiqiniseko sokuthi basebenzisa kuhle imithi leyo ngoba eminye yakhona ilakho ukubulala izilimo nxa ingasetshenziswanga kuhle.
