uMthunywa
Johas Moyo
INHLANGANISO yeLivestock Production Development isikhuthaze abalimi ukuthi bafuye izifuyo zomdabu ngoba kulula ukuzinakekela, kazidingi indleko ezinengi njalo kazihlaselwa lula yimikhuhlane.
Ekhuluma loMthunywa uMnumzana Cosmas Muzunde onguLivestock Production Officer esabelweni seMatabeleland North ukhuthaze abalimi ukuthi baphatheke ekufuyeni izifuyo zakuleli ngoba zisenza ngcono kulalezi ezesiLungu.
“Sikhuthaza abalimi abakumaphurojekithi okufuya ukuthi bakhuthazane ukuthi bafuye izifuyo zomdabuko, lokho sikutsho ngoba inkomo, imbuzi, kanye lenkukhu zakuleli kufuyeka lula ngoba lokudla kwazo akuhluphi njengokwesikhiwa.
“Sinanzelele ukuthi abafuya inkomo bahlangana lohlupho olukhulu lokuthi eminye imithi eyabe ifunakala kuzifuyo zabo iyabe ifuna imali enengi yena umlimi engelayo njalo ezinye zakhona kazenelisi kuphila zingahlatshwanga amajekiseni,” kulandisa uMnu Muzunde.
Uthe labafuya inkukhu labo bahlangana lohlupho olufanayo ngoba inkukhu zama-broiler zidinga imithi eminengi okwenza indleko zibenengi ikanti abanye bayabe bengakwenelisi lokhu.
“Sikhuthaza abalimi ukuthi bananzelele ukuthi inkukhu zemakhaya ziyafuyeka lula ngoba zisidla laloba yikuphi ukudla eziyabe zikutholile.
Ziyenelisa ukudla amatuku lemikhaza esibayeni zingaguli kanye lentethe lezibungu ikanti ezesilungu zidinga ukudla okuthengwayo njalo lemithi yazo iyathengwa ikanti ezesintu zelatshwa ngechena lamahlamvu ezihlahla,” kuphetha uMnu Muzunde.
