uMthunywa
Izizwe zonke jikelele ngokwehlukana kwemihlobo yazo zidla izibungwana ezithize ezehlukeneyo. Esinye isizwe singekudle okudliwa ngesinye kumbe ngithi omunye umuntu kasidli isibungu engisidlayo lami angisidli asidlayo.
Lapha kithi eZimbabwe zikhona izibungwana ezidliwayo ezinye zazo ziyisitshebo esimnadi okwamagama.
Lezi izibungu zigoqela:
1. Amacimbi
2. Intethe
3. Amahlabuse
4. Izinhlwa
5. Inswabanda
Lamuhla ngizakhuluma ngesitshebo samacimbi. Wona-ke aziwa kakhulu lapha eZimbabwe. Asengezinye zezinto ezithengiswayo loba ezithengiselwana lamanye amazwe.
Icimbi yisinanakazana esikhulela ezihlahleni sisidla amahlamvu. Kulezihlahla ezimbili lapha amacimbi azalelwa khona njalo akhulela khona. Izihlahla zamaphane lezenondo. Udumo lwawo lapha kwelakithi lusendaweni ethiwa kusemaphaneni, khonale eKezi. Abantu abavela kumagumbi amane eZimbabwe bayawasukela bayewagola khonale babuyele ezindaweni zabo bafike bawadle amanye bawathengise.
Ukugolwa kwamacimbi
Akhula ezihlahleni kusukela kuLwezi kuze kuyefika kuMbimbitho njalo agolwa ngalezi zikhathi. Ayabanjwa ngalinye kumbe ngamabili akhanywe okubi okuphakathi aphoselwe emgqonyeni. Abantu bayawazi amnandi kakhulu, langemnandi lokhu bakunanzelela ngemibala yawo. Nxa usufike lawo ekhaya uyawagezisa emanzi ubusuwapheka ngebhodo ufake isawudo. Uwathi futhuthu okwesikhatshana ubusuwakhupha uwachaye elangeni aze ome athi qha.
Wabeke emigodleni usuzabe ulokhu ucupha khona awesitshebo. Nxa emanengi ungawasa emakethe.
Okundingekayo
1. Amacimbi aphekwe omiswa alingene isitshebo semuli yakho
2. Imbiza lophini
3. Amafutha okupheka
4. Isawudo lebilebile
5. Amatamatisi lehanyanisi
Ukuphekwa kwamacimbi
1. Thatha amacimbi amalutshwana alingene imuli yakho.
2. Wafake emanzini amalutshwana uwapheke okwemizuzu elitshumi kuphela.
3. Bona ukuthi amanzi atshile.
4. Thela amafutha .
5. Khazinga kuze kungathi kuyomayoma kodwa ubone ukuthi akomi kakhulu.
6. Faka itamatisi ngokulisikelela, ngokunjalo faka ihanyanisi uyikhazinge yodwa ngamafutha yaze yaba luthuthuvana.
7. Khazinga uphenduphendula amacimbi ndawonye letamatisi ndawonye lehanyanisi.
8. Thela isawudo lebilebile kumbe i-curry powder.
9. Ngokuthanda kwakho ungatshiya kungani komile kancinyane kumbe uthele amanzana angafikephi angaba zinkezo zokudla ezinhlanu.
Sesivuthiwe-ke khathesi isitshebo sakho samacimbi, lodlulayo usesizwa uqhatshi olumnadi olumhugayo. Nxa ungakaze uwadle amacimbi awazi lutho. Qalisa ngemva kokubala lapha.
Ukudliwa kwamacimbi
Nanzelela ukuthi amacimbi ayisitshebo esithatha indawo yenyama, angadliwa lesitshwala, irayisi, amagwili lamatshakada. Udle ufake imibhida yakho eceleni. Angadliwa njalo kumadili njengama-snacks. Alamavithameni alungele ukwakha lokuqinisa umzimba. Nxa ungadli inyama ebomvu ngenxa yokholo lwakho kumbe imikhuhlane ungadla amacimbi isitshebo esimnandi.
