uMthunywa
Pumulani Mpofu
Ingxabano zabazali ziyancindezela amalungelo abantwana.
Kukhona ingxabano ezibakhona ezimulini ezidala ukuba abanye bacine bengasakhulumisani.
Esikhathini esinjalo kubakhona abuhlukuluzekayo ngalezingxabano njalo kuvame ukuba ngabantwana ngoba bona lokhu okubangwa ngabadala kuyabe kungaphathelananga labo kodwa kusuke kubeyibo abathwala nzima kakhulu.
UThubelihle ngomunye wabantwana abazithola besebunzimeni ngenxa yengxabano eyabakhona ebazalini bakhe.
UThubelihle yintombazana eleminyaka engamatshumi amabili. Abazali bakhe uThembani loRuth babethathene kodwa kwasuka kwaba lokuxabana okwenza behlukana.
Bathi besehlukana uThubelihle eleminyaka eyisithupha wamtshiya loyise wathi yena ngeke enelise ukuhamba lomntwana amgcine.
UThubelihle wakhula ehlala labakibo kayise ngoba unina angelathando lokuhlala laye ngenxa yengxabano yakhe abalayo loyise.
Usizi lwaba yikuthi behlukana bengakamthathisi incwadi yokuzalwa ngakho wafunda wacina engenelisanga ukuthi abhale imihloliso yakhe yeO-level.
Ekwehlukaneni kukaThembani loRuth akuzange kwaba lokukhulumisana okuhle ngakho akukho owayefuna ukuncenga omunye kumbe ukukhuluma lomunye baze balibala ukuba kukhona umntwana abalaye bendawonye.
UThubelihle wakhula ehlala loyise logogo wakhe unina engakaze ambone laye unina engazake amdinge.
Waqala manje uThubelihle ukuthi yena sefuna ukuthathelwa incwadi yokuzalwa ngoba efuna ukuqhubeka efunda, waqala engathi uyayivika indaba uyise ngoba engelancwadi zesibhedlela ezifana lekhadi lesibhedlela le-birth record njalo engalaso isifiso sokuqala ukudinga uRuth ngemva kweminyaka eminengi kangaka, kodwa njengoba umntwana wayesefuna incwadi yokuzalwa kwasokumele aqale ukumdinga ethanda engathandi.
Waqonda la uRuth ayehlala khona ngakibo wathola kulonina kaRuth labanawakhe lodadewabo wabika ukuba umntwana usefuna ukuthathelwa incwadi yokuzalwa kodwa kwakhanya ukuba labo abalasifiso sokusiza.
UThubelihle wadana esizwa lokhu wasesithi kungcono ahambe loyise bayezama ukuyathatha kodwa bafika baziswa ukuba kumele umama abekhona loba sebelayo i-birth confirmation record.
Asihlanganeni kuviki elizayo
Umlobi uthinteka ku trinitytrust6gmail.com, www.trinityproject.biz <http://www.trinityproject.biz>, 0773195055, 09881508
