uMthunywa
Cornelius Luphahla
KUVELE ukuba kuleqembu labathakathi ebeselithwalise izakhamizi zeSiphezini ngempumalanga yedolobho lakoBulawayo amagabha avuzayo ngokukhunkula mihla lamalanga.
Phezu kwalokhu kubikwa lababantu bagada isikhova ebusuku nxa besiyakwenza imithanithani yabo.
Lokhu kuphumele egcekeni ngoLwesine kuviki ephelileyo lapho esinye isalukazi esihlala komunye umuzi okuthiwa kukoLusaba, okutholakale ukuthi nguNkosazana Moyo nje kuphela, sibanjwa xhaka sigcine isikhova esicathulweni somzukulu waso.
Isikhova lesi kubikwa ebusuku besikhula sibeyinkalakatha obekusenza senelise ukuthwala abathakathi abangu-12 besiyakhunkula.
Kuzwakale njalo ukuthi yiloba uNkszn Moyo njengomkhulu wabakhunkuli nguye okade efuye isikhova lesi kayisuye yedwa umnikazi waso kodwa ngesezinye njalo izakhamizi zakule indawo.
UMthunywa uvakatshele kule indawo wakhulumisana loNkosazana Phetheni Mathe oyisakhamuzi waveza ukuthi wasibona ngawakhe amehlo leso sikhova.
“Kwabizwa abaphurofethi esigabeni bathe besenza umsebenzi wabo baqonda emzini wakoLusaba lapho abafika bahwatsha isikhova esesabekayo.
“Bafika babikela uMaMoyo ukuthi bayazi ukuthi ugcine isikhova esisetshenziswa ngabathakathi nxa besiyakhunkula.
Balwisana laso isikhova lesi esasiphakathi kwesicathulo njalo sisala ukuphuma.
“Ngamangala ngoba isikhova sakhona sasilamabala amhlophe labomvu njalo silobuhlalu entanyeni. Bathi bembuza ukuthi wasithatha ngaphi wathi basidinga bebanengi yena nguye kuphela osigcinileyo,” kutsho uNkszn Mathe.
UMnumzana Bhekimpilo Mpala oyisakhamuzi sakule indawo uveze ukuthi yena okwamethusayo yikuthi abaphurofethi laba bathi isikhova lesi siyahamba endaweni ezikhatshana lezakhamizi lezi zisiyakhunkula.
“Mina ngamangala sengisizwa abaphurofethi laba bethi isikhova lesi bekuyiso njalo ebesisebenza ukuthatha ukudla okutshiyeneyo okufana lempuphu emizini yezakhamizini sisiyanika umnikazi waso. Abaphurofethi laba baveza njalo ukuthi isikhova lesi siyahamba kanye laphetsheya kwelizwe siphenduke ngobusuku bunye,” kutsho uMnu Mpala.
Ebuzwa ngale indaba uNkszn Moyo walile ukukhuluma wathi intatheli kayiyebhala ekuzwileyo yena kafuni kusakazwa ilizwe lonke.
“Mina ngeke ngikutshele lutho ngale indaba hamba uyebhala khonokho okuzwileyo ngoba mina kangifuni ukuthi ngisakazwe ilizwe lonke, yikho ngingakutsheli lutho,” kutsho uNkszn Moyo.
Induna yakule indawo uMnumzana Zephania Sigola ebuzwa ngale indaba uveze ukuthi indaba le ifikile endlebeni zakhe.
“Indaba yokukhitshwa kwesikhova koLusaba ngiyizwile njalo zinengi izinto ezikhitshwa kule indawo ngabaphurofethi engababiza ngilezakhamizi,” kuphetha induna uSigola.
