Uncategorized

Umbono woMthunywa: Abantu kabekele ukuhlambazana ebulenjini

22 Jul, 2016 - 00:07 0 Views
Umbono woMthunywa: Abantu kabekele ukuhlambazana ebulenjini

uMthunywa

UKUTHUTHUKA kwezokukhulumisana lokuhanjiswa kwemibiko kuyinto enhle kakhulu njalo kungaletha inguquko ebalulekileyo emphakathini nxa kungasetshenziswa ngendlela eqondileyo.

Kuqakathekile njalo ukuthi abantu bananzelele izingozi eziza ngenxa yalokhu kuthuthuka kwezokukhulumisana lokuhanjiswa kwemibiko nanko phela sekulokuganga okunengi ngenxa yobulembu.

Ngenxa yendlela zokukhulumisana ezifana labo-WhatsApp laboFacebook, sekulokuganga osekubhahile kakhulu emphakathini, abantu bayathethisana, beyisane kanye lokuthumezelana imibiko lemifanekiso ehloniphisayo.

Ngenxa yalokhu kuganga, isizwe asisakheki njengoba lemizi isichitheka mahlayana nanko phela ubulembu sebubangele ukuthi abanye abantu bangathembeki emitshadweni yabo.

Akulanto embi ngokusebenzisa ubulembu ngoba buyindlela elula njalo eyenelisekayo yokukhulumisana kodwa uhlupho yikuthi abantu basuka babusebenzise ngendlela ezingafanelanga.

Esikhathini esinengi kuqala sakudlala kodwa abantu bacine sebejola sibili. Uthole umuntu otshadileyo lanxa ehlezi lomkakhe abelokhu ephethe esisitheka yedwa kumakhalekhukhwini wakhe.

Abanye njalo ngabathumeza amabhayisikopo kanye lemifanekiso yabantu abanqunu. Kambe nxa abantu abadala bezakwenza izinto ezifana lalezo, mfundiso bani abayinika abantwana?

Kwezinye izikhathi umphakathi wawusole abantwana nxa sebeziphatha butshapha ulibale ukuthi abantwana labo bayilokhu abayikho khona ngenxa yalokhu abakubona kubazali babo.

Ingozi enkulu kakhulu ngalokhu yikuthi abantwana bangabona imifanekiso le  balakho ukuthi bayekwenza lokho abakubone emifanekisweni esemafonini abazali babo.

Lokhu kucina kubafaka engozini yemikhuhlane ethelelwana emacansini efana labongulamakhwa kanye legcikwane lengculazi.

Abazali abathanda ukugcina amafilimu abantu abasemacansini bayimfundiso embi kusizwe sakusasa, kwabasakhulayo. Abantwana nxa bebona abazali babo begcina imifanekiso le emafonini  abo basuka bacabange ukuthi lokho kuyinto eqondileyo.

Kungumbono kaMthunywa ukuthi uzulu wonke nga uyananzelela indlela asebenzisa ngayo ubulembu ukuze kwenqatshelwe ukumemetheka kwengozi eziza ngenxa yokusebenzisa ubulembu ngendlela engafanelanga.

Kuqakathekile ukuthi abazali bonke bananzelele ukuthi nxa labo besebenzisa ubulembu, babusebenzise ngendlela ezakuba yisibonelo lakubantwababo, indlela eyakhayo.

Kuqathekile ukuthi sisebenzise ubulembu njengendlela ezosisiza empilweni lekwakheni isizwe hatshi njengesikhali sokubulalana lokuzibulala.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds