uMthunywa
Silo Charles Dube
Sebetheza inkuni khonale egangeni uLontethe wabiza uSenzile ethi kathezele duze laye. Lokhu kwenza lwambenga uvalo uSenzile engazi ukuthi sekutheni esebizelwa eduze.
Yikho esizwa khona uLontethe ethi uzabuyela emzini wakhe ngakusisa, ngakho-ke ubone kufanele ukuthi engakahambi atshiye emelulekile uSenzile. Waqala inkulumo yakhe uLontethe ethi umhlaba kawusenjengezolo.
Kwamehlula ukuphendula uSenzile, ngoba owezolo umhlaba engawazi. Kodwa wathiya indlebe ngoba wazi ukuthi kukhulu okwakusiza.
Wavuma uLontethe ukuthi kusasa babezakwehluleka ukusola abantwana nxa bengabalayanga khathesi.
Njengoba wayefisa ukuthi angabadanisi abazali bakhe uSenzile wavuma ngenhliziyo lokho okwakukhulunywa ngunina omncane. Waqhubeka uLontethe ethi abantwana babebalekela emadolobheni nje ngoba babeswela ababalayayo. Wayesethinte udaba olwalusegudwini olokubaleka kwabantwana betshiya imizi yakwabo besiya emadolobheni anjengakoBulawayo.
Esizwa lokho umkhumbulo kaSenzile wagijimela kuNgenzile loSilobile. Wabesaba. Laba basebenze isenzo esilihlazo eHadlana ngokubaleka bengavalelisanga kwabo baya edolobheni. Kusadliwa ngoludala sibili lapha eHadlana. Lanxa sekungene isifo esibhidliza amasiko balokhu bekhona ababambelele kuwo. Sizwa lapha kuthiwa uSenzile wabakhalela abaphansi (amadlozi phela) ukuthi bangamyekeli atote odakeni lwaboNgenzile loSilobile.
Kayikamngeni impehlane echithe ubuntu bukaNgenzile loSilobile.
ULontethe, obizwa ngelikaNakaHlalaphi kwezinye izibanga ogwalweni lwethu lolu waphikelela etshela uSenzile ukuthi umntwana uzwa abazali bakhe ngoba bangaze bamsunduzela ekufeni. Laye uSenzile wakholwa ukuthi abazali bakhe bangaze bakwenza lokhu. Wayaphambili uNakaHlalaphi esithi, “Nxa lifuna ukubalekela ubuthakathi, bantwabethu, lingaceli abathakathi ukuthi balikhafulise, ngoba bazalicabela umuthi obukhali.
“Odinga ukwazi ukuthi ubuntombi bugcinwa njani angaze abuza kosewachithekelwa yibuntombi, ngoba efuna ukugcina obakhe.” Konke lokhu wakukholwa uSenzile ngoba engumntwana olembeko. Waqhubeka uNakaHlalaphi ethi kayikho intombi engahamba lomfazi. Bangaxoxani njengoba bengasafanani nje? Uhlakaniphile uNakaHlalaphi wabona ukuthi ngengxenye umkhumbulo kaSenzile uthi, “Kanti mama angithi wena wendile, mina ngingumntwana!”
Ngakho wawukhuza masinyane lumbono.
Watshela uSenzile ukuthi unina womuntu angaze amfundisa ububi umntanakhe, ngumthakathi kuphela ongakwenza lokho. Wakukholwa uSenzile lokho. Wayaphambili uLontethe ethi lalapha okulomhlabathi ovundileyo khona umntwana ukulayelwa ngabazali bakhe, ngoba izimunyu bayazazi ukuthi kazilakudla zingumango wendlala.
Ngamazwi aqatha la yikho engabanga lawo okuphendula uSenzile. Wabandezela khonapho uLontethe etshela uSenzile ukuthi kuhle ukuthi nxa umuntu engakazibopheli abuze kubonina ukuthi labobantu ngabantu yini, kumbe yizidumbu nje.
Kwathi kusithi abuze uSenzile ukuthi abantu ngabanjani, uNakaHlalaphi ngokuhlakanipha kwakhe wangathi uyawubona umkhumbulo womntanakhe wamkhumbuza ukuthi wayebezwile ngezolo kwakhona. Waqhubeka uLontethe ethi umfazi ulanda ukufuywa ekwendeni. Umntwana ozalekileyo ubona ngabazali bakhe. Lapha abazali bakhe bokha umlilo khona, laye uyawokha. Yadinga inhliziyo kaSenzile kodwa kwathi ziba kuye.
Siluphetha lapha udaba lwethu kuliviki. Hlangana lathi kuviki ezayo ukuthi uNakaSenzile lomnawakhe uLontethe babefuna ayekwendela ngaphi uSenzile.
