uMthunywa
Silo Ophezulu Stinta
Ngeviki edluleyo sitshiye uNgonyama esidla amalahle esediniwe yikubangelwa umsindo nguMaMsie.
Wayekubone kufanele ukuthi laye ake aphakamise ilizwi njengendoda. Wamazisa ukuthi laye abe linina elizihloniphayo aziphathe njengenina njalo. UMaMsie wavala ngokuzikhalisa esengokhala ngempahla yakhe eyayichithekelwa butshwala kanye lokudonswa njengenja, wayesejayele ukuzenzela santando lapha ekhaya enguntando kayiphikiswa kodwa-ke wayesazi njalo lapho okumele acine khona.
UNgonyama waphuma endlini etshiya uMaMsie esebona kungcono ukuthi ayezigezela atshaywe ngumoya mhlawumbe lobuthongo babungehla. Lapho-ke uMaMsie waqonda kumaqandisa lapho afika akhupha khona enye imbodlela yotshwala. Wahle wayinathela endlini yokudlela engafuni ukubona uKhotso kaNgonyama elokhu etshudutshudula izitulo zakhe ezibutofotofo. Okunye njalo inhliziyo yayivele ibuhlungu ngelokuthi wayephuthiselwe ukuya kholisa emdlalweni wakoZat.
UMaMsie linina elithanda utshwala ngokwedlulileyo okumenza abe yisidakwa. Kumehlisa isithunzi loba nje yena engakunanzeleli konke lokhu. Esahlezi ezinathela imbodlela yakhe wayelokhu ezigayela izibozi. Inhliziyo yakhe yayilokhu icabanga uJoza. Uthi nguye-ke umuntu owayemenza azizwe engumuntu, umzimba wakhe ujabulile.Wayezisola lokuthi ngabe waqala wabona uZat engakaze abone uNgonyama.
Wayefisa nje ukuthi ngabe watshada loZat. Uyavuma ngempela ukuthi uNgonyama ukhaliphile into nje amcaphula ngayo ngeyokungathandi ukuzikholisisa, lalapho kuhlekwa emgidweni yena wayengahleki ngitsho ngendlela uMaMsie athanda ngayo.
UNgonyama waqeda ukugeza waginya amaphilisi ekhanda ehlose ukuzitholela ubuthongo. Wabuyela ekameleni labo lokulala wafikelwa yingqondo ethi avalele uMaMsie lo phandle njengoba wayezabe engobanga umsindo njalo nje.
Ngokumazi kwakhe wacabanga masinya ukuthi wayengasuka aye bhodlisela kuKhotso owayezilalele endlini yokuphumulela evele engazi lutho umtaka Bubbles.
Watshibilika kwaze kwasa uNgonyama. Wayethatha ebeka engazi lokuthi enzeni abambe kuphi ngesilingo ayesesihlelwe nguBubbles. Ingqondo yakhe yabhoda isabhoda impendulo engayitholi. Okunye okwakumzwisa ubuhlungu kakhulu yindlela umkakhe ayemgilela imikhuba ngayo, kwakubuhlungu ngoba layo imikhuba yayingaqondakali njalo ingakhwabitheki. Laye wayesezisola ukuthi kwakutheni kodwa aze akhethe kubi kangaka.
