Ingena kunyikinyeke phansi imbongi yohlanga

22 Jul, 2016 - 00:07 0 Views
Ingena kunyikinyeke phansi imbongi yohlanga uObert Dube

uMthunywa

Njengoba oNdukuzibomvu amajaha omkhonto bethi igula elidala livame ukunuka amasi lokhu kusuka kugcwaliseke kuphephandaba likazulu nanko phela kalideli ukujabulisa uzulu ngendaba zalo ezimnandi kwezokuzithokozisa.

Angithi nje kule iviki liphethe imbongi kazulu ehaya indlela evusa usinga.

Kambe kungaba ngubani ongena kuvuke umqholoha endodeni ngaphandle kukaObert Dube ijaha elimajaha mabili.

Kayihayi nje lindoda igiyafefe lingumfana. Othanda ukujabula kule iviki nansi ingxoxo enambithekayo phakathi kuka Obert Dube (OD) lentatheli yephephandaba likazulu uCornelius Luphahla (CL).

CL: Umphakathi uthanda ukwazi ukuthi ngubani uObert Dube njalo udabuka ngaphi?

OD: Mina ngazalwa mhlaka 12 Nkwenkwezi esigabeni seKanyandavu eLupane okuyikho engakhulela khona ngaze ngayangena uGiredi 1 esikolo seKanyandavu Primary. Ngaqhubeka ngezifundo zami ngaze ngayaqeda kulesisikolo uGiredi 7. Ngasuka lapho ngayafunda eGogo Secondary lapho engangifundiswa khona ngesinye isakhamuzi engangiselusela inkomo zaso. Kwathi ngo2002 ngasuka njalo ngayafunda eSiyamagoza Secondary School lapho engaqeda khona uFomu 4 ngo2003.

Ngemva kwalokho ngasuka ngayadinga umsebenzi eBotswana ngo2004 ngabotshwa ngaphenduka ngazoqhubekela phambili ngezifundo zami ngemva kokuba ngihlangane leyinye indoda koBulawayo yangithatha yayangifundisa eVictoria Falls uFomu 6 eMosi oya Tunya High School ngaze ngaqeda ngo2005.

Ngemva kokuqeda uFomu 6 ngayasebenza koPowersales okwesikhatshana ngasengisiyafundisa eMosi oya Tunya okweminyaka embalwa okuyikho engaqhubeka khona ngezifundo zami ngayafunda i-Human Resources.

CL: Njengoba inengi lembongi livame ukuba zimbongi ngemva kokuqunjwaqunjwa ngezinye imbongi thize, wena waqunjwaqunjwa ngubani njalo waqala nini?

OD: Ukuba yimbongi ngaqala ngo2010 ngemva kokuqunjwaqunjwa nguBhekumuzi umculi wakweleMzansi. Lokhu ngakuqala ngokuthi ngangithi nxa ngisemikhosini etshiyeneyo kube yimi engihlela umkhosi lo ngibe ngibonga abantu ngibahaya njengembongi. Ngemva kwalokho abantu abanengi bangikhuthaza ukuthi nxa ngingaba yimbongi ngingenza kuhle kakhulu. Yikho okwenza ngahle ngaqala ukuba yimbongi uqobo.

CL: Lokhe waqala ukuba yimbongi wandise ukukwenzela ngaphi inkondlo zakho?

OD: Njengembongi kazulu inkondlo zami ngandise ukuzenzela emphakathini ikakhulu lapho okulemikhosi etshiyeneyo efana lemitshadweni, emidlalweni kanye lakweminye imikhosi ehlukeyo. Ngike ngayakwenza inkondlo zami eSwaziland, eSouth Africa kanye leZambia. Ekuhayeni lapha kangikhethi ukuthi ngihayele ngaphi, ngihaya kuyo yonke indawo lapho engimenywe khona.

CL: Lokhu waqala ukuba yimbongi sowakhipha amadlalade amangaki njalo abantu bathini ngomsebenzi wakho?

OD: Njengembongi edumileyo sengakhipha amadlalade amathathu lokhe ngaqala ukuba yimbongi. Idlalade lakuqala ngalikhipha ngo2013 njalo lithi Uthando Lwami, kulandele elika2015 elithi We Are One kucine elika 2015 elithi Half Time engalikhipha ngiloJeys Marabini.

Ngalokhu-ke abantu bayawujabulela kakhulu umsebenzi wami njalo bangikhuthaza ukuthi ngingawudeli ngiqhubekele phambili ngibajabulisa. Bangikhuthaza njalo ukuthi ngibakhiphele i-DVD ukuze bangibone ngamehlo.

CL: Akutsho jahelidala ukuthi ukhangelele ukwenzelani uzulu lonyaka njengembongi kazulu?

OD: Lonyaka ngikhangelele ukuphekela uzulu idlalade elihlabusa okwedlulisileyo elinguncindambophe. Okunye njalo sengibhale njalo ugwalo lwenkondlo ukuze abantu bazibalele bazizwele uluju engiluphekayo.

CL: Bunzima bani oyake uhlangane labo njengembongi njalo nkuthazo bani oyipha imbopngi ezisacathula?

OD: Ubunzima engiyake ngihlangane labo ekubeni yimbongi yikuswela imali yokukhipha amadlalade ukuze ngithuthuke kanye lemali yokukhipha ingwalo zenkondlo ngokusemthethweni. Ngalokhu kumbongi ezisacathula ngithi ziqhubekele phambili ngomsebenzi wokuba zimbongi njalo zingawudeleli ngoba uqakathekile kakhulu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds