uMthunywa
Silo Khulu
Kangisakholisi emacansini
Ngingudade oleminyaka engu-28, ngilonana olenyanga eziyisithupha njalo ngihlala lobaba wengane. Nansi inkinga ngiyamthanda ngenhliziyo yami yonke kodwa Khulu nxa kumele senze ucansi angisela mizwa.
Ngiyabe ngingafuni kwezinye izikhathi kodwa ngicina ngizibamba ngamandla ngisizwa ukuthi angikholisi. Sokulamaviki amabili ngifaka i-pad ngimtshela ukuthi ngisesikhathini. Kuyini inkinga Khulu ngoba ubaba uzacina esiyaphandle ngibhekile. Siza, ngenzeni?
Impendulo
Ubaba yena ulemizwa yini? Useke wakhalaza ukuthi akakuzwa kuhle na? Iqiniso lithi nxa engelansolo ngalokho umyeni wakho esizwa kungelamehluko kutsho ukuthi usesebuthakathaka ngenxa yokubeletha. Umzimba wakho kawukabuthi wahlangana.
Nxa umngane wakho ekholisa iba sesimeni sokukholisa lawe ungaze wafuna ukukholisa wena ugula. Kudala mzukulu umntwana wakuqala wawumbelethela ngakini ngenhloso yokuthi unyoko akuphe izihlahla zokuqinisa umzimba. Kodwa ungaze wephuka umoya kuyaphela ubudlezane bungedlula.
Kafuni ukuthi ngitshaye umntwana
Angazi kumbe ngiyaphambanisa kodwa ngidinga uncedo kuwe Khulu. Umkami kafuni umntwana athintwe, uleminyaka yokuzalwa emine pho ngimfundise njani nxa esithi angawona engatshaywa. Khulu uhlala njalonje efuna ukungitshaya nxa ngingakhuza umntwana uthi ngiyamhlukuluza kukanti umntwana lo kezwa. Khulu ngimtshele njani umkami ngokuqakatheka kokufundisa umntwana esesemncane?
Impendulo
Ungakhulumi lomkakho, lungisa umntwana. Umbambe ngoswazi kakhulu nxa engaphambanisa. Angakucebela kubaba walele wena uthi ngithe ngizamtshaya yena uthi ngimtshayile. Ungazoneli umntwana. Umntwana lo kakafiki kusibanga sokuthi alixabanise. Umlamulankunzi luswazi, angithi lawe ngumntanakho. Lebhayibhili mzukulu likubeka sobala ukuthi uswazi kumele lusetshenziswe ukuze kwesulwe ubuwula emntwaneni.
Sengifuna ubhambo lwami
Khulu kunjani ngileminyaka engu-50 yokuzalwa, ngafelwa ngubaba wabantwabami eminyakeni engu-10 edluleyo.
Umkami ngimzilele. Sengifuna ukuthi ngabe ngiyathola umuntu wokuthi siphile sonke kodwa kangifuni kuthandana lomuntu othetheyo. Khulu ngingenza njani ukuthi ngibekwazi ukuthi lo ngumuntu ongifaneleyo. Lokhe ngabhujelwa angikaze ngithandane lomuntu ongubaba. Abantwana sebelemizi yabo bonke kungakho sengihlala ngedwa.
Impendulo
Into yile mama wami, umuntu ongubaba ozisondeza phansi kwakho qala umbuze ukuthi ulomfazi yini noma wake wathatha. Nxa wake wabalomfazi labantwana bangaphi labo bantu khathesi? Angakutshela iqiniso lakhe leminyaka yakhe angaze aba ngumuntu oleminyaka emilutshwana kuleyakho. Kumele abe ngusowenu noma abemdala kancane kulawe.
