uMthunywa
Nansi isitshebo sesintu esiqakathekileyo esasitshetshwa ngokhokho kodwa lamuhla silokhu sisaziwa njalo sitshetshwa ngoludala lolutsha. Lesisitshebo silula ukuthi lawe uzenzele sona. Qala ngokulima amazambane kodwa lawo amazambane ungawathenga ezitolo lasemakethe. Nxa uwalimile uzazenzela idobi lakho, kulezi insuku idobi ungalithenga lisembodleleni ezitolo.
Longakwaziyo ukuchola idobi ulakho ukulithenga selicholiwe. Abantu abagulayo imikhuhlane eyehlukeneyo bayacetshiswa ukuthi badle idobi ngoba liqinisa imizimba ngokulwa lemikhuhlane leyo likutshiye usuqine saka.
Ngubani ongafuni impilo enhle, dlana-ke idobi uqine njalo ziphekele loMaMoyo yena opheka okumnandi kodwa.
Ngitshilo ngathi idobi yisitshebo, nanzi-ke izitshebo zedobi ezehlukeneyo.
Idobi lemibhida yomfushwa
Imibhida yomfushwa yimibhida ephekwe yachaywa yonyiswa. Iyasiza kakhulu ngoba ebusika imibhida ingasekho wena uzabe ulokhu ulayo emgodleni wakho utsheba ukholisa ungahlupheki amavila ehlupheka.
Lapha-ke lamuhla kulendlela ezinengi zokupheka isitshebo sedobi, wena zikhethele indlela oyithandayo njalo elula kuwe. Phela idobi usulalo lanxa ungakwazi ukulichola usulithengile esitolo kumbe uliphiwe ngugogo.Khumbula ukuthi lonke liyafana umehluko yikuthi wena upheke njalo. Yonke imibhida ungayipheka ledobi emanzi kumbe echayiweyo (imifushwa) wena okwakho yikupheka kuhle ukuze udle ukholise.
Idobi lemibhida yolude loba imibhida yendumba
Okudingakalayo
1 Idobi ngokwalo elicholiweyo kumbe elithengiweyo.
2 Umfushwa wolude kumbe indumba
3 Isawudo/itshukela, ibilebile, i-pepper, imbiza yokuphekela, inkomitsho yamanzi lophini
Ukupheka
1 Hlanganisa idobi lamanzi aqandayo.
2 Goqozela embizeni elamanzi atshisayo, thela imibhida uyekele kuxhwathe emlilweni olingeneyo.
3 Thela isawudo, ibilebile thela njalo itshukela ngokuthanda kwakho.
Idobi lemihwabha
Ukupheka
1 Qoba imihwabha uyipheke ivuthwe utshiye umhluzana.
2 Qwaqela idobi emanzini aqandayo uthele phezu kwemihwabha evuthiweyo.
3 Yekela kuxhwathe emlilweni olingeneyo. Faka isawudo, ibilebile kumbe i-pepper.
4 Faka njalo amafutha loba itshukela ngokuthanda kwakho.
Ukudliwa
Dlana lesitshwala, irayisi kumbe amagwili. Dlana ancinde iminwe ngobunandi ukholise.
