uMthunywa
YiNtatheli kaMthunywa
ISITHANDWA sabadlali beHighlanders uPeter Mudhuwa usethembise ukuthi uzaqhubeka ebhada ingcino ngemuva kwenkundla okuyikhona okumele kwethuse iHarare City mhla izodlala leTshilamoya kuZNA Charity Shield, eMagumeni ngeSonto.
Akuthandabuzwa ukuthi phakathi kwazo zonke imvimbi, uMudhuwa uvala kuqakeze inkundla yonke. Kumaviki amabili adluleyo uMthunywa ukubike emphakathini ukuthi kulisizini uzavimba ngci, kungabi lula ukuthi kubelebhola elidlula kuye.
Ngaphandle kokuvala, umdlali lo usetshengisele ukuthi ulalo ithalenta lokudlala kundawo ezinengi phakathi kwenkundla. Lokhu sekumenze wahlonitshwa njengevimbi ethenjiweyo kuBosso.
Kuncede ukukhalipha kukamqeqetshi uErol Akbay othethe umfana lo wamfaka enzikini yokuvimba inkundla elokaputeni uFelix Chindungwe.
Umdlali lo wazise iphephandaba likazulu ukuba kuyamkhuthaza ukuthi ahlonitshwe ngabalandeli njalo ulesiqiniseko sokuthi uzaqhubeka evimba okuzwayo.
“Sengithole ukuhlaliseka kulisizini. Ngizavala kuze kuse lonyaka. Angifuni ibhola elidlula kimi, ngitsho lokuthi ngenze iphutha emuva kwenkundla,’’ kutsho umdlali lo ngoLwesibili.
NgeSonto iHighlanders inxuse iHarare City eBarbourfields kubangwa ihawu leZNA Charities. Akwaziwa ukuthi kuyozalani kulumdlalo ngoba amathimu womabili ayadelelana.
Umdlalo lo uzakuba ngowokuqala olomvuzo phandle kwePSL.
Ekhuluma loMthunywa kumaviki amabili adluleyo, ukaputeni uChindungwe kazange afihle umphini ngokuthi uMudhuwa usenze kwabalula ukudlala emuva.
“UPeter Mudhuwa asimdlali omutsha. Umsebenzi wokuvala kunguqu uyawazi. Usenze abalandeli basethemba njengabadlali abasemuva kwenkundla.
“Njengabadlali uMudhuwa uyabe engamutsha kithi,” kutsho ukaputeni owabukela umdlalo weHighlanders leCaps United esebhentshini labalimeleyo. Kulumdlalo iBosso yanqoba 1-0.
UMudhuwa uphenduke waba yisithandwa sababukeli benguqu ngokwenelisa kwakhe ukuvala aphinde atshiye abagadli bamanye amathimu benkemile. Ukwenzile eBarbourfields ngeSonto edluleyo ngokuvala yonke imzamo yengcitshi yakudala uLeonard Tsipa.
UTsipa ucine usethole ikhasi elibomvu kunozinti ngenxa yokutshaya uMudhuwa ngekhanda, ezondiswa yikuthi lumdlali weBosso usevale amabhola akhe amanengi.
Kumdlalo weZNA Charities, umqeqetshi weHarare City uMoses Chunga utshele uMthunywa ngoLwesithathu emini ukuthi uzakuba nguye umqeqetshi ozanqoba umncintiswano wokuqala kuligi yeCastle Lager.
“Engingakutsho yikuthi ngilande ukuzonqoba koBulawayo. Ngiyayifuna i-ZNA Charities Shield,” kutsho lumqeqetshi.
