uMthunywa
Ncekwenhle Ncube
ZITHABE zimanzi te izakhamizi zeDulutsha kulandela ukusungulwa kwephurojekithi yokulima amakhowa exhaswe ngumeli wedale lePhalamende wakule indawo uKhomuredi Clifford Sibanda ngenhloso yokuthi zithole inzuzo.
Iphurojekithi le isungulwe ngoNhlangula ngenjongo yokuzithuthukisa isigaba ukuze sibe lamaphurojekithi ehlukeneyo nanko phela besokuvame awokufuya inkukhu abesesandelwa ngabantu njalo obesekusenza kubenzima ukuthola abathengi.
Ekhuluma lentatheli uKhmrd Sibanda uthe wenza konke okusemandleni akhe ukusungula amaphurojekithi atshiyeneyo esigabeni seBubi ukuze abantu laba benelise ukuziphilisa.
“Ngiyananzelela ukuba kunengi abantu beBubi abangakwenza okokuziphilisa kodwa kungaba kuhle nxa abanye bengaba kubhizimusi yamakhowa kusenzelwa ukuba wonke amabhizimusi eBubi aphakame njalo akhule,” kulandisa uKhmrd Sibanda.
UNkosikazi Lilian Mavhoko olilunga lephurojekithi le ohlala eDulutsha uveze ukuthi bajabule kakhulu ngokuqaliswa kwale iphurojekithi njalo njengezakhamizi kuzabanceda ukuziphilisa lezimuli zabo njengoba lesivuno salonyaka singabanga sihle.
“Kube yisibusiso esivela kumlimu kithi eDulutsha ngokusungulwa kwephurojekithi efana lale, ngikhuluma nje kulamanye amanina asenelise ukubhadala izikwelede ezikolo besebenzisa imali abayizuze ngokuthengisa amakhowa abo.
“Thina ngapha eDulutsha isivuno sethu sisithengisa emkambo okoBulawayo kodwa ngokuya kwesikhathi sikhangelele ukuthi isivuno sethu sisithengisele ngaphandle kwelizwe ikakhulu emazweni esingcelelane lawo agoqela iSouth Africa,” kutsho uNkszn Mavhoko.
UMthunywa ukhulumisane loConstituency Development Officer uMnumzana Walter Moyo ochaze ukuthi iphurojekithi le izasiza ikakhulu intsha ngokubavezela amathuba omsebenzi.
“Iphurojekithi le sikhangelele ukuthi incedise abaswelayo ezigabeni ezitshiyeneyo eBubi ngoba akuduli ukulima amakhowa kanti njalo abantu abatsha bazazuza imisebenzi ezabasiza ukuthi baziphilise njengoba kungelamisebenzi kulezinsuku.
“Ekupheleni kwayonale inyanga sizakwenza idili lapho esizakupha izicoco lezipho labo abazabe benelise ukuzuza isivuno esibize intengo ephezulu emkambo,” kuphetha uMnu Moyo.
